Re bolokegile go Jesu Kriste – Letšatši la 10
Matšatši a Masomenne ao a ilego a Šikinya Lefase
(Di)temana ya Bibele
DITIRO 1
LUKASE 24
Batho ba bantši, gaešita lehono, ga ba dumele gore Morena Jesu o tsogile bahung. Seswantšhong sa monna wa mohumi le Lasarose, Jesu o hlalošitše gore ge ba sa theeletše Moshe le baprofeta, le ge yo mongwe wa ba ba hwilego a ka tsoga ba ka se kgolwe. (Lukase 16:31)
Gomme ge e ba Kriste ga se a ka a tsošwa, tumelo ya lena e ka se le hole ka selo, le dibe tša lena ga se tša swarelwa (1 Bakorinte 15:17). Le ge go le bjalo, nnete ke gore Kriste o fentše lehu le go itšweletša go balatedi ba gagwe matšatši a 40, a ba kgodiša gore ka nnete e be e le yena gomme mmele wa gagwe o bontšhitše dika tša tlaišego ya gagwe.
O ba kgodišitše ka nnete ya go tsoga ga gagwe bahung. Maria Magadalena o mo tsebile ka tsela ye a boletšego le yena ka yona, ba bangwe ka tsela ye a bego a hlaloša mangwalo a makgethwa le go rapela pele a ngwatha senkgwa le go ba nea sona.
Le ge ba bangwe ba barutiwa ba be ba ekwa ka se, Morena gateetee a itšweletša go bona. “Bonang diatla tša ka le maoto – ke nna ka sebele. Mphopholeng, le tla iponela ka bolena, gobane seriti ga se na nama le marapo bjalo ka nna ge le mpona.” Lukase 24:39
Bibele e re ba be ba tletše ka lethaba le go makala; e be e le Jesu wa bona ka nnete. “Tše ke ilego ka le botša tšona mola ke sa na le lena šedi; tšohle tše di ngwadilwego ka melaong ya Moshe le ka dipukung tša baprofeta le ka dipesalomeng mabapi le nna di swanetše go phethega. Ya ba gona a ba sedimošago ditlhaologanyo gore ba kwešiše Mangwalo a Makgethwa.” Lukase 24:44-45
Jesu o tsebile ka mo go lego bohlokwa kudu go balatedi ba gagwe gore ba dumele ka nnete gore o tsogile bahung le gore ka lebaka la gagwe, le bona ba tla tsoga bahung.
Bao, sebete sa bona se tekemego le go palela nakong ya tlaišego le lehu la gagwe, ga bjale ba na le kholofelo ye e mpshafaditšwego le tebo. Le ge go nagana fela ka lehu go ka ba go ba boifišitše, ka ge go boifiša bontši bja rena, lehu ka bolona le be le se sa ba boifiša. Baapostola ka moka (ka ntle le o tee) ba be ba tla lebeletšana le mahu a go hwela tumelo, eupša ba be ba sa boife.
Ba tutueditšwe ke Kriste yo a tsogilego bahung le go matlafatšwa ke Moya wo Mokgethwa, ba tsebagaditše kanegelo ya bophelo bja gagwe, lehu, tsogo le thotogelo go fihla mafelelong a bophelo bja bona. Kriste o tsogile bahung. Ka nnete o tsogile bahung!
