Re bolokegile go Jesu Kriste – Letšatši la 20

Maphelo a batho ba bangwe a ka re gopotša gore Modimo o na le leano go yo mongwe le yo mongwe wa rena. E ka no se be se rena re se gopolago goba se re se nyakago, eupša ke thato ya gagwe ya bophelo bja rena.

Moapostola Andrease, o be a sa atlega kudu bjalo ka ngwanabo, Simone (Petrose). Petrose e be e le monna wa sebete gape a belegetšwe go ba moetapele. Modimo Tate o mo utolletše gore Jesu ke Mesia. Pego ye e dirile gore Jesu a re, “Etse ke wena Petrose. Bjale godimo ga lona leswika le ke tla aga kereke ya ka …” (Mateu 16:13-20). Petrose o begile ebangedi ka Letšatši la Pentekoste gomme batho ba 3 000 ba dumela (Ditiro 2:41). Petrose gape a tsoša mosadi yo a hlokafetšego bahung (Ditiro 9:40). Bodiredi bja Andrease bo be bo sa swane le bjo, eupša o be a le bohlokwa bodireding bja Petrose.

Andrease o dirile eng? Andrease o išitše Petrose go Jesu.

Andrease e be e le morutiwa wa Johanese Mokolobetši. Johanese o tsebile Jesu bjalo ka Kwanyana ya Modimo, gomme Andrease le morutiwa yo mongwe ba ya go bona Jesu. Ka taletšo ya Jesu, ba hlwile le yena letšatši ka moka (Johanese 1:36-39). Gateetee morago ga fao, Andrease a hwetša ngwanabo, Simone (Petrose), gomme a re go yena, “Re hweditše Mesia” (Johanese 1:41), gomme a mo iša go Jesu.

Ke Andrease yo a tlišitšego mošemane yo a bego a na le dinkgwa tše tlhano tša garase le dihlapi tše pedi go Jesu (Johanese 6:8-9).

Kua Jerusalema, ge Bagerike ba bangwe ba eya go Filipi gore ba nyaka go bona Jesu, Filipi o ile go Andrease gomme bobedi ba ya go botša Jesu (Johanese 12:20-22).

Andrease o išitše batho go Jesu. O be a le karolo e bohlokwa ya leano le morero o mmotse wa Modimo, bjalo ka rena lehono.

Mosepelong wa rena wa boikokobetšo wa tumelo, re ka iša batho go Kriste ka sebele goba ka tsela ye nngwe, ka go netefatša gore motho yo mongwe o ba le Bibele, gomme ka go phahla matlakala a yona, o tla kopana le Jesu.

Ke mahlatse go ba Mokriste le go kgona go bega ebangedi.