Re bolokegile go Jesu Kriste – Letšatši la 12

Letšatši la Thotogelo ke letšatši leo Bakriste kae le kae ba gopolago thotogelo ya Morena wa rena Jesu Kriste go ya legodimong. Thomo ya gagwe e be e phethilwe. O be a eya gae.

Mengwage e masometharo-tharo pele ga lehu la gagwe, o tlogetše setulo sa gagwe sa bogoši letsogong le letona la Modimo, a ikokobetša gomme a tla lefaseng ka sebopego sa motho. O tsebile gore o be a hloka go gafa bophelo bja gagwe ge e ba batho ba be ba swanetše go ba le kholofelo ya go boelana le Modimo.

Mo lefaseng, khuduego ya monagano le tlhorišo ya mmele ye Morena wa rena Jesu a e kgotleletšego, go bao a bego a tlile go ba phološa, ke tše ntši go ka di ngwalwa fase. O itemogetše kgobošo, go hloka toka, dikotlo tše šoro, go bethwa gomme mafelelong, bohloko bja go hlokafala sefapanong ka bohloko bjo bogologolo.

Ga bjale, go Thotogelo yeo ya pele, matšatši a 40 morago ga tsogo ya gagwe bahung, o be a eya gae.

O feditše nako e ntši le barutiwa ba gagwe, a ba kgodiša ka bogona bja gagwe gore ka nnete o fentše lehu le go bolela le bona ka mmušo wa Modimo.

O ba file ditaelo ge a arogana le bona: Le se ka la tloga Jerusalema. Le letele mpho ye Tate a le holofeditšego yona. Mpho yeo e be e le gore ba tla kolobetšwa ka Moya wo Mokgethwa. Ga ba a kwešiša gore se se ra go re eng. Ba mmotšiša: “Morena, na setšhaba sa Israele o tlilo se tsošetša mmušo gona mo nakong tše?” Ditiro 1:6

Ka ge ba be ba phela ka tlase ka pušo ya Roma, barutiwa ba be ba nagana gore Jesu o hlaloša gore o tlo ba tsošetša mmušo wa Israele.

Ka gona, Jesu o ba botša gore: “Ga se taba ya lena go tseba dinako le mabaka ao Tate a a beilego ka maatla a gagwe yena mong.” Gomme, Jesu o ba botša ka temana ya rena ya letšatši (Ditiro 1:8) ya ka godimo.

Jesu o be a re, “Nka se le botše gore ke boa neng. Le ge go le bjalo, se ke se le swanetšego go se dira. Le swanetše go ba dihlatse tša ka le go bega molaetša wa ka go fihla magomong a lefase gomme Moya wo Mokgethwa o tlo le maatlafatša go dira se.”

Ge a seno realo, a rotošetšwa legodimong ba mo lebeletše, gomme a širetšwa ke leru, ba se sa mmona.