Nako e bohlokwa – Letšatši la 20
Go tšwa go nako go ya go sa felego
(Di)temana ya Bibele
BAEFESO 1
Ekaba polelo “go dira tše ntši ka nako e nnyane” e a go ama? Ge go le bjalo, batho ba bantši ba tla dumelelana le kgopolo ya gago.
Ge re e ba le didirišwa tše ntši tša elektroniki go bebofatša mošomo wa rena, re swarega kudu. Lega go le bjalo, ke a ipotšiša ge e ba re tla gadima morago go ditiro tša rena tša bjale le go bona gore nako e ntši ya rena e ka ba e šomišitšwe bokaone. Ka gobane go na le kotsi ya gore re ka swarega kudu go mešomo ya rena ya letšatši le letšatši mo re ka lebalago dilo tše bohlokwa.
Moapostola Paulose o re file tsebo mabapi le leano la sephiri la Modimo go bao a ba kgethilego, bao ga bjale ba laolwago ke nako eupša bao a ba kgethilego ka go sa felego.
Morero le leano la Modimo, pele lefase le ka dirwa, e be e le gore rena re be bana ba gagwe ka kopanelo le Morena Jesu Kriste. Ka Morwa wa gagwe, re šegofaditšwe ka tšhegofatšo e nngwe le e nngwe ya moya magodimong.
Leano la Modimo le tla ba le feletše ge a bona gore nako ke ya maleba go kopanya batho ba gagwe mmogo le lefase ka moka go khutšo e e phethagetšego le yena, ka tlase ga bolaodi bja Kriste.
Seo se akaretša wena, gape, ka gobane – “Ka Kriste le lena le bile ba Modimo mola le ekwa molaetša wa nnete, e lego Taba ye Botse yona e le begetšego tša phološo. Le ile la dumela go Kriste, gomme Modimo a le swaya leswao la gagwe ka go le fa Moya wo Mokgethwa wo a bego a le holofeditše wona. Moya wo ke yona peeletšo ya gore re tla fiwa tše Modimo a di holofeditšego ba e lego ba gagwe …” (Baefeso 1:13-14).
Lerato le legolo la Modimo go rena le netefatša gore re lapa la gagwe ka Morena wa rena Jesu Kriste le go ba karolo e bohlokwa ya leano la gagwe la mafelelo. Re ba lehlogonolo e le ruri.
Modimo ga a tumišwe, ka dilo tše kgolo tše a di dirilego.
