Nako e bohlokwa – Letšatši la 18

Go lebogwe ditokelo tša tswalo le go gola ga gagwe, Paulose e bile mofenyi e sa le o monnyane.

Paulose, ka gobane o belegetšwe kua Tarsose, o be a na le tokelo ya dikholego ka moka le tšhireletšo ya Mmušo wa Roma tše di bego di fiwa badudi.

Bjalo ka Mojuda wa kgoro ya Bajamene le Mofarisei, maemo a gagwe le ditshwanegelo di be di se na bosodi. Tumo ya Paulose ya go hlomara badumedi ba Bakriste le boloki bja gagwe bjo bo theilwego go molao, di be di mo netefaletša bokamoso bjo bo kaonekaone.

Gomme ge a le tseleng go ya Damaskose, o ile a kopana le Morena Jesu yo a tsogilego bahung. Seo se fetotše bophelo bja gagwe.

Morago ga go kopana le Morena wa rena Jesu Kriste, ditokelo ka moka tša go feta le diphihlelelo tša gagwe tša fetoga lefeela. “Tobo” ke lereo le maatla le a le šomišitšego go hlaloša bohlokwa bja tšona ge di bapetšwa le se Modimo a mo filego sona go Jesu Kriste (Bafilipi 3:5-6).

Potego ya Paulose le phišego le boikgafo go Morena le Mophološi wa rena Jesu e be e le ye e feletšego. Re swanetše go kgahlwa ke mohlala wa gagwe. Phološo ya rena e ka no ba e be e se ka tsela ye Paulose a kopaneng le Jesu eupša go gongwe tseleng ya bophelo, re kopane le Jesu yo a tsogilego bahung gomme ra araba.

Go a direga gore bophelo bja rena bja moya bo lahlegelwe ke go phadima ga bjona. Re a retetšwa. Go kgahla diabolose, re hlokomologa go bolela le Morena ka thapelo goba go bala Lentšu la gagwe gomme ga re ye ditirelong tša go tumiša ka ntle le mabaka ao a kwagalago.

Ke ka nako yeo re hlokago go boela tseleng.

Ga se taba ya go beakanya dilo tše di tlago pele maphelong a rena eupša go hwetša selo se se tlago pele maphelong a rena – Morena Jesu Kriste. O swanetše go ba wa pele ka mehla, motheo moo tumelo ya gago e tsemago le moo bophelo bja gago bo agwago gona.