Nako e bohlokwa – Letšatši la 13
Lengwalo la mafelelo la Paulose
(Di)temana ya Bibele
2 TIMOTHEOSE 1
Ge o be o tseba gore o kgauswi le go hwa, molaetša wa gago wa mafelelo go baratiwa ba gago o be o tla ba bjang? Paulose o be a le boemong bjoo ge a be a le mogolegwa kua Roma. O ngwaletše Timotheose lengwalo yo a bego a mmona bjalo ka “morwa yo a mo ratago” (2 Timotheose 1:2).
Paulose o be a tseba mmago Timotheose le makgolo wa gagwe gomme ge Timotheose a godile, a ba mogwera wa Paulose le mošomi-gotee.
Ditlhago tša bona di be di fapana. Paulose o be a hlalošwa bjalo ka “tau ya Modimo” (Great Lion of God ka Taylor Caldwell). E be e le molwi wa go se boife yo a bego a ikemišeditše go lwa le mogwera goba lenaba ka phišego ya, le boikgafo go mošomo wa Bokriste.
Timotheose e be e le monna yo monnyane. O be a se na boitshepo bja moapostola, ka tlhago e se motho wa go hlagiša maikutlo gape a na le dihlong.
Paulose o be a mo šireletša: “Ge Timotheose a ka tla moo go lena”, Paulose o ngwaletše Bakorinte, “le mo sware gabotse, ka gobane ke modiredi wa Morena bjalo ka nna. Go se be le yo a mo nyatšago …” (1 Bakorinte 16:10-11).
Lengwalo la Paulose le tletše ka dikgonthišetšo le keletšo e botse go Timotheose. Tabataba ya lona e kgolo, ya kgotlelelo go tumelo ya Bokriste, e direga go Bakriste ka moka.
Re swanetše go botega go Morena wa rena Jesu Kriste go maemo ka moka. Ka gobane Modimo o re phološitše le go re biletša bophelong bjo bokgethwa – e se ka gobane go na le selo se re se dirilego eupša ka lebaka la morero wa gagwe le kgaugelo. Kgaugelo ke mogau wo re sa o šomelago wa mahala wa Modimo. Kgaugelo yeo e filwe rena go Kriste Jesu pele mathomong a nako.
Keletšo ya mafelelo ya Paulose go Timotheose e be e le gore a tšwele pele go tumiša le go bega ebangedi. Keletšo ye e swanetše go latela le go fetišetšwa go bao re ba ratago.
Paulose o ruma lengwalo la mafelelo le a le ngwetšego ka ditšhegofatšo tše pedi. E tee go Timotheose – “Modimo a be le moya wa gago” le e tee ye e re akaretšago le rena – “Morena Jesu a le gaugele ka moka”.
Go yona, re ka araba fela ka gore – Amene. Amene. Amene.
