Nako e bohlokwa – Letšatši la 11
Nako ya rena ga se nako ya gagwe
(Di)temana ya Bibele
2 PETROSE 3
Augustine, yo mongwe wa botate ba kereke ya pele, o boletše gore nako ke pharologantšho ya tlholo. Pele ga tlholo, nako bjalo ka ge re e tseba, e be e se gona.
Lega go le bjalo, rena ka go ba karolo ya tlholo re laola ke nako. Go sa felego ga e na magomo a bjalo. Modimo ga a bone nako bjalo ka rena. Se mohlomongwe ke ka lebaka leo go Bakriste ba bangwe go boa ga Jesu go tšeago lebaka le letelele.
Gomme gape, go na le bakodutli bao ba kudutlago ditumelo tša Bakriste. Ba dula ba ikemišeditše go sola le go nyatša tumelo ya motho.
Petrose o lemošitše Bakriste ba pele (2 Petrose 3:4) gore bakodutli ba tla botšiša: “Kholofetšo ya gore Kriste o tla boa e feletše kae?” Batho ba belaetše gore Morena wa rena o tla boa ka sebopego sa motho mehleng ya Petrose gomme go na le bao ba sa belaelago mehleng ya rena.
Go bonala eke ke nako e telele go tloga mola Morena wa rena a tlilego lefaseng la pele go re phološa dibeng tša rena, nako e telele go tloga mola a gafilego bophelo bja gagwe go rena sefapanong. Lega go le bjalo, na e šetše e le nako e telele go tloga ka letšatši leo le leso historing? Go fetile matšatši a ka tlase ga milione go tloga ka nako ye a bapolwago le go tsoga bahung!
Petrose o re botša gore lebaka la go diega ke go se fele pelo ga Modimo. Ga a nyake gore go lahlege motho, eupša o nyaka gore bohle ba itsholele dibe tša bona (2 Petrose 3:9).
Seo ke tlhohlo go rena. Ga re tsebe gore Morena Jesu Kriste o tlo boa neng, eupša go fihla a etla, re swanetše go mo hlankela. Re swanetše go phela maphelo a go boifa Modimo, re botege go lentšu la gagwe le go šomiša monyetla o mongwe le o mongwe go rera ebangedi ya gagwe.
