Na o a leboga? – Letšatši la 2

E sa le wa bogela ntwa ya matswele nakong ya go feta? Boramatswele ba binabina ba dikologana gomme nako e yo mongwe wa bona a bethago yo mongwe gabotse ka letswele, mophegišani o a tekateka, a leka go ema gabotse. Menaganong ya rena, le rena re na le ntwa ya matswele ye e diregago letšatši le letšatši. Leina la ramatswele o tee ke Tebogo, gomme yo mongwe, Go se kgotsofale.

Go se kgotsofale o thopa ntwa ge re wela molabeng wa go ipapetša le ba bangwe le go se kgotsofale ke tše re nago le tšona. Ka gona re thoma go nyaka ntlo e kgolo, koloi ya mabaibai, monna wa go bontšha lerato ka ditiro, leemo la mmele le lebotse, mosadi o mokaone le mošomo o mokaone. Le ge go se na bothata le go ba le maikemišetšo a go phela gobotse mmeleng ka dilo tše o nyakago go di hwetša nakong e tlago, potšišo e bohlokwa ke gore: na o a kgotsofala ka se o nago le sona ga bjale le mo o lego gona bophelong bja gago? Ge go se bjalo, go na le dikgonagalo tša gore o ka se thabe goba go kgotsofala ge o hwetša dilo tše o di nyakago.

Tebogo, ka letsogong le lengwe, e lahlela letswele le lebotse ge ka boomo o ikgopotša ka dilo ka moka le batho ka moka bophelong bja gago bao o kago leboga ka bona – gomme o tšwela pele go leboga Modimo ka seo.

Go 1 Petrose 5:8 re bala gore: “Le phafoge, le ntšhe mahlo dinameng, gobane Sathane, lenaba la lena, o phaphaila bjalo ka tau ye e bopago, o nyaka yo a ka mo rwaetšago.” Lenaba o fihlelela se ka go bjala dikgopolo menaganong ya rena go re re ipapetše le ba bangwe – re tseba gore ge re ka palela, re tla inyatša. Go Baroma 12:2 re bala gore: “Le se swantšhe mekgwa ya lena le ya batho ba mo lefaseng, le upše le dumelele Modimo gore a le fetoše ka go le mpshafatša dikgopolong. Ke mo le tlago tseba se e lego thato ya gagwe se se lokilego, se se mo kgahlago, se se feletšego.”

E tee ya ditsela tše kaone ya Tebogo go ka lwa morago ge Go se kgotsofale a lahlela letswele, ke go lemoga se se diregago monaganong wa gago. Ka go lemoga gore o ipapetša le ba bangwe, o ka kgaotša seo le semeetseng ka go ka leboga. Go fa mohlala, mogwera wa gago o go botša gore monna wa gagwe o mo išitše felotsoko. Le wena o rata go ka tšwa, eupša monna wa gago ga a go ise felo. Go e na le go mo sola, o ka ikgopotša gore o a botega go wena le gore o go thuša ka bana. Goba o ka hloya mošomo wa gago. Go e na le go ngongorega, ikgopotše gore batho ba bantši ba ba sa šomego ba ka neela ka se sengwe le se sengwe gore ba hwetše mošomo – ešita le wa gago!

Ke mang moetapele ga bjale kerekeng ya gago – Tebogo goba Go se kgotsofale? A re lemogeng bothata le go lwa le bjona ka tsela ya maleba, gore re kgone go netefatša Tebogo, ka legoa le legolo diatla di le moyeng, o tla tsebišwa go ba mofenyi! Modimo a go šegofatše.

O leboga ka eng? Babadi ba bararo ba leboga tše di latelago:

Talana Westvig: “Mengwaga e mmalwa ya go feta, Morena o phološitše morwa wa ka. Gape o bušitše monna wa ka gae ka polokego, le go re phagamiša go pankoroto le dihlong go ya go lefelo la phenyo. Ga bjale re reka ntlo ya rena, bobedi re na le mešomo ye mekaone gomme lapa la rena le boelane. Ke tumiša le go leboga Modimo ka mogau wa gagwe le ditšhegofatšo.”

Katrien van der Merwe: “Ke leboga gore Tate o thomile go ntšhomiša go tloga ka Hlakola 2013 bjalo ka sedirišwa go rera ebangedi sehlakahlakeng sa Koh Phangang kua Thailand. Ke leboga tšhegofatšo ye nngwe le ye nngwe go tšwa letsogong la gagwe.”

Henk du Plessis: “Ke a leboga, Morena, ka pula e botse ye e nelego ka nako ya sehla sa pula go hlatswa manyami le tlhophego ya komelelo. Ke rapelela mogau wa gago go tikologo e nngwe le e nngwe e e wetšego ke komelelo mo pula e nyakegago kudu. Ke a leobga, Morena, ka ge ke phetše gabotse mmeleng, ka lelapa la ka, lenyalo la ka, morwedi wa ka le gore ke sa buša moya. Ke loboga gore ke wa gago.”