Na o a leboga? – Letšatši la 1

Banna ba lesome e sa le ba rakwa setšhabeng ka lebaka la bolwetši bja bona bja letlalo bjo bo sa alafegego. Ba ile ba swanela ke go tlogela metse ya bona, baratiwa ba bona le ditoro tša bokamoso, gomme ba ipea lekatana. Se e be e le bophelo ka nako yeo, ge o be o na le bolwetši bja letlalo.

Ditaba tša gore Jesu o feta motseng wa gabobona di ba file kholofelo. Na mohlomongwe o tla kgona go ba fodiša? Ka tlalelo, ba kitimela mmileng moo Jesu le barutiwa ba gagwe ba bego ba feta gona. Ba ema kgojana le batho, gomme ba thoma go goeletša: “Jesu, Mong wa rena, hle, nke o re šokele!” Ba bangwe ba bona ba khunama ba kgopela dikeledi di elela marameng a bona. Ba tsebile gore Jesu e be e le kholofelo ya bona e le noši ya go phela gabotse gape. Potšišo e be e le: Na o tla ba kwela bohloko?

Jesu a lebelela banna. A ba kwela bohloko gomme a araba ka gore: “Eyang go baprista ba le bone.” Ba rile ba sa ya ba ipona ba fodile ba hlwekile. Nako ya phetogo. Nako ya phodišo. Nako ya kholofelo ye e tsošološitšwego le lethabo. Banna ka moka ba lesome ba fola, eupša ke o tee fela yo a boetšego go Jesu go mo leboga ka mohlolo wo.

Go Baefeso 5:20 re bala gore: “Ka ge le le ba Morena wa rena, Jesu Kriste, ka mehla le leboge Modimo, Tatagorena, ka lebaka la tšohle.”

Ge o lebelela morago bophelong bja gago, ke dife tša dithapelo tša gago tše di arabilwego? Ke lefelong lefe moo o itemogetšego dikatlego? Ditšheleteng tša gago? Na Modimo o phološitše lenyalo la gago? Na o imile mafelelong? O fodišitšwe bolwetši? Goba o hweditše mošomo morago ga go o nyaka dikgwedi? O lebogile Modimo ka katlego ya gago goba ekaba, bjalo ka banna ba senyane, ka ntle le go nagana o gatetše pele ka bophelo morago ga go amogela mohlolo?

Go phela ka boitshwaro bja go leboga go nolofatša go phela go ya ka mantšu a Baefeso 5:20. Re tla leboga Modimo dinakong tše botse le tše boima, re tseba gore o laola dilo. Gomme ka gobane o tseba tše di tlago hlaga nakong ye e tlago, o ka kgona gateetee go hloma nako ya phetogo bophelong bja gago, nako ya phodišo le kholofelo ye e tsošološitšwego.

A re pheleng re leboga le go tšwela pele go leboga Modimo – bjalo ka monna yola o tee, Mosamaria, yo a boetšego go Jesu – gore le rena re mo kwe a re: “Tumelo ya gago e go fodišitše.” Modimo a go šegofatše.