Modimo wa lerato, kholofelo, kgaugelo le khutšo – Letšatši la 8

Dilo ka moka di na le lebaka la tšona, tšohle di na le nako ye di e beetšwego ke Modimo lefaseng. … nako ya go nyama le nako ya go thaba … Mmoledi 3:1,4

Ka moka ga rena re nyaka go itemogela lehlakore la letšatši la bophelo. Ka dinako tše dingwe, re lebelela batho ba bangwe gomme ra nagana gore bophelo ke mokete o mogolo go bona! Le ge go le bjalo, ge re ka dumelelwa go lebelela maphelo a bona re le kgauswi, ka pela re tla bona gore ga re kwešiše boemo ka moka.

Andries Cilliers o ngwetše gore: “Se ke ka fao lefase le lebegago: kgokagano magareng ga tše botse le tše mpe. Bophelo ke matswalo le lehu, poelo le tobo, ntwa le khutšo. Se sa ra gore bao ba nyakago tše botse fela bophelong ba a iphora.”

Morago ga gore Jobo a lahlegelwe ke tšohle le go tšwa dišo tše bohloko mmeleng wa gagwe ka moka, o rile go mosadi wa gagwe, “Na re ka amogela dilo tše dibotse go Modimo, tše mpe tšona ra di gana?” (Jobo 2:10)

Ke wena fela yo a tsebago gore o ka gare ga sehla sefe bjale. Mohlomongwe, go fihlile go wena mesong ye gore o nakong ya lethabo le legolo; o na le mabaka a mantši a go sega le go thaba! Goba mohlomongwe, se se fapanego ke nnete; o ka ikwa gore, bjale, gago selo se o ka se thabelago gomme kholofologo e tšhošetša go go gateletša.

Modimo wa Mmoledi le Modimo wa Jobo o sa laola nako. Modimo o laola dinako tša rena ka moka. Ke ka tsebo ye ge Paulose a ngwalela Bafilipi, “Thabang ka mehla le le ba Morena. Ke a boeletša, ke re thabang! … Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo” (Bafilipi 4:4,6). E ka ba o le nakong ya lethabo goba ya manyami, o ka tseba gore Modimo o swere nako ya gago ka letsogong la gagwe.