Modimo wa lerato, kholofelo, kgaugelo le khutšo – Letšatši la 7

Dilo ka moka di na le lebaka la tšona, tšohle di na le nako ye di e beetšwego ke Modimo lefaseng … O beetše selo se sengwe le se sengwe nako ye e se swanelago. Mmoledi 3:1,11a

Khopolo ya nako ka mehla e tšwelela go gongwe dipoledišanong tša rena tša letšatši le letšatši. Sa go makatša ke gore gantši e bolelwa boemong bjo bo fošagetšego – selo se bjalo ka “Ke swaregile kudu, ke be ke se na nako” goba “dilo ka moka ke lepotlapotla” goba “lebelela ka fao nako e sepetšego ka pela”!

Nako, yeo e lego mpho go tšwa go Modimo, ke molaodi wa rena. Go e na le go laola nako ya rena, ke mo ekago nako ke sekeitipoto ka tlase ga maoto a rena yeo ka tlalelelo re gomarelago go yona, go leka go ba ka godimo! Re rulaganya dilo tše ntši gabotse, eupša ge go etla go nako, re tšwela pele ka go se šetše.

Gantši, re nagana ka tsela ye ka nako:

Tšohle di ka leta go fihlela ka morago,

Tšohle lefaseng di ka šuthišwa

– go fihlela ke ikwa go ka dira

– go fihlela ke ikwa bokaone

– go fihlela bana ba ka ba godile, goba ba tšwile ka ntlong

– go fihlela ke belaetše kudu ka yona

… go fihlela e le morago ga nako kudu.

Mohlomongwe go na le lengwalo, emeile, go letša mogala goba ketelo ye o bego o e šuthiša dibeke – mohlomongwe, bjale ke nako ya gore o e dire. Mohlomongwe, lehono ke nako ya go tutuetša, go lebalela, go bolela goba go homola. Mohlomongwe, nako e fihlile ya go boela morago gomme o lokiše dilo.

Ke hweditše sereto se sa Seisimane ka gare ga dikarata tše ke di beilego (ke duma ge e ba ke be ke tseba mongwadi wa sona):

Ge ke na le nako

ke ngwala sereto,

kopelo ye e tlago opelwa.

Ge ke na le nako

go na le ngwana yo ke mo hlahlago

ke a rapela.

Ge ke na le nako

ke anega kanegelo,

ke etela mogwera.

Mmalo, nako e fedile –

Sereto ga se a ngwalwa,

kopelo ga e a opelwa.

Ngwana ke monna

o godile a sa hlahlwa.

Thapelo, ao! Thapelo,

ga e a rapelwa.

Kanegelo e fedile.