Modimo ke Mang? – Letšatši la 9

Baisraele ba be ba eme makgahlanong a go kgahliša, gape a go tšhoša historing ya bona bjalo ka batho ba ba kgethilwego ba Modimo. Ba be ba le kgauswi le go tsena Nageng ye e Holofeditšwego, phethagatšo ya kholofetšo ya Modimo, eupša ba be ba tšhogile ka ge ba be ba swanetše go raka ditšhaba tše šupa, tšeo e bego e le tše ntši gape tše maatla go feta bona, tšeo di bego di dula nageng, pele ba ka dula fao.

Ka moka re a tseba ka taba ya go phologa ga bao ba lego thata fela gomme re tseba gabotse ditlhohlo tšeo Baisraele ba bilego le tšona ka go ba sehlopha se senyenyane. Gantši re kwa ka maemo moo dihlopha tše fokolago di fenywago go fihla moo di ineelago ke sehlopha se maatla, ekaba go tlhago, dipolitiki goba lebaleng la dipapadi, gomme maemong a mangwe bjalo ka ka tiro ye bogale ya sepolitiki, di feleletša di fedišitšwe. Ke semaka gore dihlopha tše dinyenyane di feleletša di ikwa di hlaselega gabonolo, di tšhoga gomme di hloka tšhireletšo. Re ka ba re ile ra itemogela seo.

Go be go le bjalo ka Israele. Dihlopha tše pedi tša dipapadi tše di phegišanago di a tseba gore ke sefe se maatla pele di thoma. Gomme Baisraele, bjalo ka sehlopha se senyenyane sa dikgoro tše ralalago, ba tsebile gore ba be ba lebeletšane le lenaba le le boifišago! Eupša e be e le batho ba Modimo.

Ba be ba na le nkgwete: Yo a ba ntšhitšego Egepeta ka Moshe – Morena Modimo ka sebele. O ba netefaletša gore lerato la Gagwe go bona le go ba gopotša gore bogolo le palo ga di bohlokwa go Yena thulaganyong ya Gagwe ya dilo. O na le bona gomme ke yo mogolo gape o lokile. Bjalo ka Mophološi wa bona, le go phethagatša keno ya Gagwe go borakgolokhukhu wa bona, O ba holofetša gore O tla sepela le bona, go ba lwela le go ba nea phenyo. Ke Modimo wa go makatša!

Se se re botša gore Modimo o rata batho ba Gagwe le go phela gabotse ga bona. O ba hlokomela kudu gore O tla ba nkgwete ya bona. O a tseba gore ba a fokola, gomme ke ba banyenyane ka palo, eupša ga a ame ke dilo tša ka ntle; O bontšha maatla a Gagwe kudu. Gomme o sa hlokomela batho ba Gagwe lehono gomme O a ba lwela!

Yo e lego wa Modimo ga a swanela go dula a tšhogile, ge a lebeletšane le tlhohlo, ka gobane Modimo e sa le nkgwete ya batho ba Gagwe!

Modimo ke Mang? Ekaba ke nkgwete ya gago?