Modimo ke Mang? – Letšatši la 7
Kgahlišago
(Di)temana ya Bibele
EKSODOSE 34
Lefase le rata tše botse, tše kgolo le go tuma, eupša ge e le gabotse e se ka tatelano yeo. Naga ye nngwe le ye nngwe e na le diabe tša yona tše di bontšhago se, e ka ba ke mahumo a kgoši setulong sa bogoši, bobotse bja phareiti ya sešole, bohlale bja sehlopha sa dipapadi seo se bilego dinkgwete, goba pontšho ya kgwebo ya boithabišo, go fa mehlala e mmalwa. Ge e le gabotse, lefase gantši le tagilwe ke maatla le bobotse bja lona go bona eke ke tše di le dikologilego. Maatla a lefase le mahumo, lega go le bjalo, ge di bapetšwa le letago la Mmopi wa lefase, di bonala di le boemong bjo fapanego kudu.
Ka kgegeo temana ya ka godimo e nea tlhalošo e kopana ya Modimo Ramaatlaohle wa go kgahliša le yo mobotse, gomme ekaba mantšu a pele a tsebagatšo ga a bolele tše di ntši? Mantšu a mmogo a hlola seswantšho sa go makatša go rena sa tlhago ya Modimo, seo se phuthetšwego ke boloki bja Gagwe, mogau le toka. Ekaba se se bapetšwa le kgopolo ya bogolo lefaseng?
Ge Moshe a kgopela Modimo go mmontšha letago la Gagwe, ekaba ka nnete o be a tseba se a se kgopelago, goba o be a imelwa ke bogolo bja thomo gore, go sa šetšwe kholofetšo ya Modimo ya go sepela le yena, o, bjalo ka ba bantši bja rena ge re lebeletšana le tlhohlo e kgolo, nyakile gore Modimo a ipontšhe bogolo bja Gagwe go yena. Ge e le gabotse o bolela kudu ge go šetšwa gore o bolela le Mang – lega go le bjalo, Modimo o a kwešiša gomme O dumela go bontšha Moshe letago la Gagwe, eupša ga a mo dumelele go bona sefahlego sa Gagwe, ka gobane ga go yo a kago bona sefahlego sa Modimo gomme a phela.
Letago la Gagwe ke boloki bja Gagwe: kwelebohloko, kgaugelo, go se felele badira tše mpe pelo, lerato le le ntši le potego go ba diketekete, tebalelo le toka. Le tšwa go Yena ka gobane O tletše ka lona. Letago la Gagwe le tšwa ka gare, mola letago la lefase le le ka ntle. Letago la Modimo ga le nyamiše ka lebaka la tlhago ya lona: tšhollelo ya lerato le tebalelo tšeo di tlago tšwela pele ka go sa felego ka gobane ke Modimo wa go sa felego, go se swane le la lefase ka gobane ke la nakwana, gomme le a fela, gomme la nyamelela ka pelapela bjalo ka ge le fihlile.
Modimo ke Mang?
