Modimo ke Mang? – Letšatši la 6

Go bitša ga Modimo Moshe go yo ntšha batho ba Gagwe Egepeta e be e le boitemogelo bjo bo makatšago go Moshe go maemo ka moka, gomme ke kutollo ya ka fao Modimo a šomago ka gona. Modimo, a sa lekanyetšwa ke magomo a lefase, o biditše Moshe ka mokgwa wo o phagametšego tlhago le go mo phagamiša go tloga go modiši go ya go moetapele.

Temana ye e bontšha dilo tše batho ba bantši ba sa di tsebego lehono, go sa šetšwe go kwagala ga tšona ka mabaka go bophelo, go tloga go dilo tša go tlwaelega go ya go tše kgethwa: badiši, mehlape, Modimo, mehlolo, pitšo, tlhompho le felo mo go kgethwa.

Le ge badudi gantši ba sa nagane ka badiši bao ba dišago mehlape, go etela mafelo a dinaga-magaeng a naga go ka utolla gore banna ba bantši le baswa dinageng tša dithaba le mellwaneng ba šoma mošomo wo o bohlokwa. Temaneng, Moshe, yo a goletšego ka mošate wa Farao kua Egepeta, gomme ga bjale o diša mehlape ya dinku tša ratswale wa gagwe. O be a sa tsebe gore o a rutwa go yo ntšha batho ba Modimo a ba kgethilego kua Egepeta le go diša mašabašaba a batho go putla leganata!

Ka nako yeo o be a sa lahlegelwa fela ke maemo a gagwe go tloga go morwa wa kgoši go ya go modiši yo a ikokobeditšego, eupša gape o be a šomela kgole le lapa la gagwe. Batho ba bangwe lehono ba ka kgona go kwešiša se. Ke ka nako ye a bego a hlankela ka boikokobetšo moo Modimo a mmiditšego.

Moshe o bona selo sa go makatša: mošwana o tuka mollo eupša ga o swe. Ke ka lebaka la eng? Ka gobane Modimo o fao! O fetola peakanyo ya tlhago ya dilo gore A kgone go itšweletša go Moshe. Bogona bja Modimo boemong bjo bo dira boitemogelo go ba bjo bo sa tlwaelegago, ka gobane ga A na magomo gomme o nyaka go dira selo sa go se tlwaelege bophelong bja Moshe. Ge A bitša Moshe ka leina le go mo laela go rola dieta, Moshe o a obamela ka gobane o eme felo mo go gokgethwa – o abagana lefelo le Modimo! Go ba bangwe se e ka ba kgopolo ye e tlabago.

Ekaba re lemoga dilo tše di sa tlwaelegago maphelong a rena? Ekaba re theeletša Modimo go bitša leina la rena? Ekaba re itokišeditše pitšo ya Gagwe bophelong bja rena goba re nagana gore re batho ba ba tlwaelegilego kudu ka ge re se na kwešišo ya se Modimo e lego Yena goba, bjalo ka Moshe, re hloka go ya kgole gore re kopane le Yena? Re ka no ba re šetše re le felo mo gokgethwa re sa tsebe.

Modimo ke Mang?