Modimo ke Mang? – Letšatši la 13

Ge o bala la pele mantšu a a bonalago e le a bonolo go Jesaya 55:8-9, a bonala a kwešišega gabotse, eupša ge re nagana ka tlhalošo ya wona, re lemoga gore a hlaloša gore ke ka lebaka la eng go na le dilo tše ntši bophelong le ka Bibeleng tšeo re sa di kwešišego. Re lemoga go tekanyo ye nyenyane bobotse bja kgopolo ya Modimo ge re lomoga bohlale bja ditaelo, melao, direto, diprofeto, dipolelo tša bohlale le dikanegelo tše ntši tšeo di lego ka gare ga Bibele, eupša ka dinako ka moka ga re amogele gore ke Mmopi wa rena le gore ga a šome go ya ka kwešišo ya rena. Bao ba sepelago le Yena ba tla dumela gore ba itemogetše dilo tše di kwešišegago ge di bonwa ka tumelo go Lentšu la Modimo.

Ge o nagana ka fao magodimo a lego kgole ka gona le lefase, o tla thabela gore lentšu la seswantšho le leka go bontšha mo bogolo bja phapano magareng ga kwešišo ya batho ge e bapetšwa le kwešišo ye kgethwa ya Modimo, gomme ka go realo le ditiro tša rena ge di tswalantšhwa le megopolo ya rena, ge di bapetšwa le ditiro tša Modimo ge di tswalantšhwa le tša Gagwe.

Batswadi, barutiši, ge e le gabotse motho ofe goba ofe yo a swanetšego go bolela selo sefe goba sefe go bao ba sego boemong bja gagwe ka lebaka lefe goba lefe, o tla tseba ka fao go lego boima ka gona go ka ba kwešiša, le ka fao dilo di ka fošagalago ka gona ka go se kwešiše goba ka dinako tše dingwe go se latele ditaelo. Bana ba ba ntši ba nagana gore ga go a loka ge ba tingwa “menate” ye e itšego yeo bagwera ba bona ba ba dumelelago go yona, goba ge dikolo tša bona di gatelela gore ba latele melao. Ga ba kgone go bona seswantšho se segolo gomme seo ke ka lebaka la gore batswadi ba bona le sekolo sa bona ba hlokomela go pheleng gabotse ga bona.

Goba mohlala wa ka fao boithabišo bja thapama bja go sepetša mpša bo kago fetoga tlhobaboroko ge mpša, ka “bohlale” bja yona, e bofologa go tomo ya yona go ka ya go mafelo ka moka ao mong wa yona a ka se e dumelelego go wona: karolo ya phaka mo dimpša tše bogale di lego gona, goba mmila wa sephetephete mafelelong a molala o mo talana wo o se nago legora. Go molaleng gore mpša e tingwa menate ye gore e phele gabotse gape e bolokege, eupša ga e kwešiše kgopolo ya mong wa yona go feta ngwana ka ya batswadi ba gagwe!