Modimo bjalo ka mothopo wa kholofelo – Letšatši la 6
Kholofelo ya bana ba rena
(Di)temana ya Bibele
JEREMIA 31
Go bolelwa ka Ragele le Lea, basadi ba Jakobo, go Rute 4:11 bjalo ka bapatriareka ba Israele – bomme ba setšhaba. Go Jeremia 31:15, Ragele o mothofatšwa bjalo ka Israele, monyadiwa wa Modimo yo a llelago morwa wa gagwe yo a thopilwego – kgoro ya Efraime.
Go Ebangedi ya Mateu re bala gore seprofeto se sa Jeremia se phethagaditšwe ge Heroda a laela bašemane ka moka ba mengwaga ye mebedi le ya ka tlase, bao ba bego ba dula Betlelehema le ditikolong tša kgauswi, gore ba bolawe (Mateu 2:16-17).
Ga go go se se kwešago pelo ya motho bohloko le go mo tlogela ka maikwelo a go makala le pefelo ge re ikwa ka bana ba ba hlaselwago gabonolo ba tlaišwa gasehlogo le go swarwa gampe. Ke šešimišitšwe kudu ke bala ka bana ba 148 bao ba bolailwego kua Peshawar, Pakistan, mengwaga e mmalwa ya go feta. Go be go se tiragalo ya go itlhaola lefaseng la kgole. Ga go na phetogo e kgolo go tloga ka nako e Heroda a “bolaya bana ba ba se nago molato”.
Tlhorišo ya bana e direga lefaseng ka bophara. Bana ba ba se nago molato gantši ke batšwasehlabelo lefaseng la rena le le robegilego la sebe.
Batswadi, le bao ba hlokomelago bana, ba na le boikarabelo bjo boima kudu. Ba swanetše go ba le tlhokomelo efe goba efe ka mo go kgonegago go šireletša bana ba bona. Ke mošomo o ba sa swanelago go o tšeela fase.
Ka dinako tše dingwe bana ba kwešwa bohloko ke bao ba ba hlokomelago. Go e na le go ipshina ka tikologo ya lethabo ye e bolokegilego, ba ikhwetša ba le ka gare ga tlhobaboroko ya tlhophego le bohloko.
Setšhabeng mo basadi ba bego ba na le maemo a tlase ka tlase ga pušo ya Molao wa Bajuda gomme bana ba se na maemo, Jesu o bile le tshwaro e botse go bana: “Batho ba bangwe ba tliša bana go Jesu gore a ba bee diatla a ba rapelele, eupša barutiwa ba gagwe ba kgalema batho bao. Jesu a re: ‘Lesang bana bao ba tle go nna, le se ke la ba thibela, gobane mmušo wa Modimo ke wa ba babjalo’ ” (Mateu 19:13-14).
Go tloga go belegweng go iša lehung, Jesu ke kholofelo le botšhabelo go bohle bao ba tlago go yena.
