Modimo bjalo ka mothopo wa kholofelo – Letšatši la 15

“Ge eba go holofela go Kriste ga rena go re hola fela bophelong bjo, gona re ba ba lebanwego ke go kwelwa bohloko go feta bohle lefaseng” (1 Bakorinte 15:19). Mo Paulose o bolela le Bakorinte ka tsogo ya bahu. Ba bangwe ba Bakorinte ba be ba re bahu ba ka se tsoge bahung.

Ge se e le nnete, gona rena bjalo ka Bakriste re a forwa. Go gafela bophelo bja gago go Kriste ke go tšea sepheto sa go phela bophelo bjo bo tlago tumiša Modimo. Ge go se na selo ka morago ga lehu, go sena legae le re ka yago go lona, go sena Modimo yo a re amogelago, ka nnete Mokriste o boemong bja go go hlomogelwa pelo. Eupša se ga se bjalo.

Dinakong tša Testamente ye Tala go yo fihla nakong ya go kgerešwa ga Tempele kua Jerusalema, Moprista yo Mogolo o be a dira tirelo ya go ikgetha nakong ya Yom Kippur, Letšatši la Poelano.

O be a tšea dipudi tše pedi gomme a di abela Morena mojakong wa Tente ya bodulo bja Morena. Ka go dira matengwa, pudi e tee e tla kgethwa go ba ya Morena gomme go dirwe sehlabelo ka yona. Madi a yona a tla fokelwa godimo ga Polokelo ya Kgwerano Felo mo Gokgethwakgethwa.

Pudi e nngwe e tla ba “ya Asasele” – pudi ya go rwala dibe. Moprista yo Mogolo, morago ga go bolela dibe tša Baisraele go Modimo, o tla di fetišetša hlogong ya pudi. Pudi ye e tla rakelwa lešokeng go yo hwa.

Madi a pudi ya Morena a tla tloša dibe tša Baisraele gomme pudi “ya Asasele” e be e rwala dibe.

Jesu Kriste, Moprista wa rena yo Mogolo, ke Kwana ya Modimo yo, ka lehu la gagwe la sehlabelo sefapanong, a tlošitšego ka madi a gagwe dibe tša rena le go re boelanya le Modimo.

Paulose ga se a tlogela Bakorinte le kgonono efe goba efe ka tsogo ya bahu: “Eupša nnete ke go re Kriste o tsošitšwe bahung, a etša thakangwaga ya ba ba ithobaletšego” (1 Bakorinte 15:20).

Kgonthišetšo yeo ke nnete go bohle bao ba hwelago go Kriste. Re tla feta go tšwa go lehu go ya go letago. Haleluya! Jesu Kriste ke Mophološi!