Modimo bjalo ka mothopo wa kholofelo – Letšatši la 10

Go “Thuto Thabeng” Jesu o ruta balatedi ba gagwe gore: “Lena le seetša sa lefase. Motse wo o agilwego thabeng o ka se fihlege. Le gona motho ga a re go gotetša lebone a le ribega ka seroto, eupša o le hloma sehlomong sa lona, la bonegela bohle ka ngwakong. Le sa lena seetša a se bonegele batho ka tsela yeo, gore ba tle ba bone mediro ya lena ye mebotse, gomme ba tumiše Tatagolena wa legodimong” (Mateu 5:14-16).

Molaetša o kwagala gabotse: Jesu, Seetša sa lefase, o ruta balatedi ba gagwe go ba barwadi ba seetša sa lefase. Re swanetše go bontšha seetša sa Kriste bobedi go rena le ditirong tša rena tša letšatši le letšatši.

Ka bomadimabe ke nnete e kwešago bohloko gore Bakriste ba bantši gantši ba na le pono e mpe go e na le go ba le pono e botse go tebelelo ya bona le go homola ka bohlatse bja bona bja Bokriste. Gantši ba ikwa ba kgopišitšwe ka maemo ao ba ikhwetšago ba le ka go wona gape ga ba na kholofelo e ntši ya gore dilo di tla kaonafala kgauswinyana. Ka bomadimabe, boitshwaro bja bona bo bontšha go nolega moko ga bona.

Go hloka kholofelo go bjalo ke go palelwa ga go tlwaelega ga batho. Norman Vincent Peale (1898-1993) e be e le mongwadi le moruti. Puku ya gagwe ye e rekišitšego kudu, The Power of Positive Thinking, e kgahlile le go hlohleletša batho ba ba ntši ka kgopolo ya gagwe ya go ba le kgopolo e botse. Pukung ye, o tiišetša boikgafo bja gagwe bjo bo feletšego go Morena Jesu Kriste: “Ke bea letšatšing la lehono, bophelo bja ka, baratiwa ba ka le mošomo wa ka ka matsogong a Morena. Ga gona se se ka go kwešago bohloko matsogong a Morena, ke tše botse fela. Go sa šetšwe gore go direga eng, go sa šetšwe dipoelo, ge ke le matsogong a Morena ke thato ya Morena gomme e lokile.”

Ga go bonolo go ba le pono e botse ge o lebane le mathata. Go e na le go lebeletšana le bophelo ka tebelelo ya boitshepo, o ikhwetša o kgopja ka go nolega moko ka go katana ga gago go ka tobana le ditlhohlo tše o lebeletšanego le tšona. Ke ka nako yeo bopaki bja Jesu bo bago bohlokwa go wena: “Ke nna seetša sa ba ba lego lefaseng. Yo a ntatelago a ka se phele leswiswing, o tla ba le seetša se se phedišago” (Johanese 8:12).

Morena wa rena o re file kholofetšo ya bogona bja Moya wo Mokgethwa maphelong a rena (Johanese 14:16-17). O tla re hlahla kgato e nngwe le e nngwe leetong la rena go ba dietša tše di phadimago lefaseng le go tumiša Morena, Mong wa rena.