Mo tumiše – Letšatši la 8

Maabane re boletše ka phapano ye lentšu la maleba le kago e dira maphelong a batho. Lentšu le le ngwetšwego e ba lentšu le le bolelwago (se se bolelwago) ge Moya wo Mokgethwa o le “phediša” gore o kgone go šogana le maemo bophelong bja gago le a badumedi ba bangwe.

Eupša o lemoga bjang ka gare ga bophelo bja gagwe bja leemaema le merwalo ya gagwe e boima gore ke lentšu la Morena le a le bolelago? Morena Modimo, yo a neago lentšu la taelo, gape ke yena yo a dirago gore ditsebe di theeletše: “Mosong wo mongwe le wo mongwe o dira gore ke hlwaye tsebe ke theeletše tše a nthutago tšona” (Jesaya 50:4). Mokgwa wo wa go theeletša o nyaka setu, go tswalela monagano wa gago go dikgopolo tše mpe tše kago šwahlela gore o kgone go kwa se Modimo a se bolelago go wena.

Ge re bala Lentšu la Modimo ka kelohloko dinakong tša rena tše re di rulagantšego tša setu, Moya wo Mokgethwa, ka tsela ye e ka se hlalošwego, o dira gore lentšu la Modimo le kwagale moyeng wa rena. Re a tseba gore ke Modimo yo a bolelago ga bjale! Gomme re nyaka go theeletša!

Lega go le bjalo, seo se tliša boikarabelo: molomo wa rena, matsogo le maoto a swanetše go kopanela le ditsebe tša rena gomme re swanetše re dire: Morena o ntirile gore ke kwešiše, gomme nna nka se mo tsogele maatla, goba ka gana (Jesaya 50:5).

Tumo ya Tatewešo ke go ka bolela le modumedi yo mongwe le yo mongwe ka boyena, eupša re šetše re tseba go tšwa go Jesaya 50:4 gore Modimo gape o šomiša batho go phediša bana ba gagwe. Ge o na le monyetla wa go ka ba ka gare ga mathata a yo mongwe yo a lapilego, dira seo ka go ithekga ka mo go tseneletšego ka lentšu le le bolelwago: “Melomong ya lena go se tšwe mahlapa; ge go nyakega gore le bolele, le bolele fela tše di lokilego le tše di holago batho, gore tše le di bolelago di hole ba ba le kwago” (Baefeso 4:29).

Lehono o ka no se bone tharollo go boemo bja gago bja kholofologo. Hagare o be a le ka gare ga boemo bjo swanago – yena le morwa wa gagwe ba be ba le leganateng, ka senkgwa le moeta wa meetse fela. Ngwana wa gagwe o be a robetše a ehwa, gomme a sa nyake go bona seo. Modimo a kwa sello sa gagwe le go bona dikeledi tša gagwe tša bohloko: “A o tshwentšwe ke eng, Hagare? O se ke wa boifa. Modimo o kwele mošemanyana a lla. Emelela, o ye o mo kuke, o mo homotše. Ke tla dira ditlogolo tša gagwe setšhaba se segolo” (Genese 21:17-18).

Tatewešo wa magodimong o tseba wena le balapa la gago. O tseba seemo sa gago sa go hloka kholofelo gomme o tla tsena ka gare ga sona. Bjalo ka Hagare, theeletša se Modimo a go botšago go se dira: 1)Se boife – Modimo o a kwa; 2) emelela; 3) kuka ngwana (pelo ya gago) o mo homotše.