Mo tumiše – Letšatši la 7

Setšhaba sa Israele se be se le bopthopša Babilonia, gomme se belaela ge eba Modimo ka nnete o be a ba rata. Ba ile ba dumela gore o robile kgwerano le bona. Seo e be e se nnete – Modimo ga a ke a roba kgwerano ye a e dirago le batho!

Yo mongwe o be a hlokwa go gopotša setšhaba gape gore Modimo, go se swane le batho, o a botega le gore o be a tseba bohloko bja setšhaba sa gagwe. Mohlanka yo wa Morena o be a sa bolele legatong la gagwe, eupša a bega gore: “Morena, Mong wa bohle, o nthutile gore ke bolele eng, ke tle ke kgone go fa ba ba lapilego mafolofolo.”

Mathata le dilo tše mpe di direga go batho ka moka, gape le go badumedi, gomme ke ka nako ye re hlokago mantšu a tlhohleletšo, kgothatšo le kholofelo – ka dinako tše dingwe gaešita tsholo. Mantšu a go hloka mohola a ka se phuleletše dipelo tša batho ba ba lapilego. Ke fela mantšu a a bolelwago go tšwa pelong ye e tletšego ka lerato le go bolelwa ka kgonthe, ao a tlago tliša tlhohleletšo le kholofelo. Eupša e swanetše e be mantšu a a nago le nnete gape a bolelwago ka go rereša.

Ga go makatše ge moprofeta a ngwetše gore: “Morena, Mong wa bohle, o nthutile gore ke bolele eng, ke tle ke kgone go fa ba ba lapilego mafolofolo (Jesaya 50:4)”. Ke Modimo fela yo a ka go tutuetšago go bolela lentšu la maleba ka nako ya maleba go motho yo bophelo bja gagwe bo lego ka gare ga mathata – mantšu e ka ba phapano magareng ga lehu le bophelo.

Go lena bao le ilelago le nagana gore, “Ke sentše maatla a ka, eupša ga se ka phetha selo” (Jesaya 49:4), Lentšu la gagwe le re: “Le ge go le bjalo, ke botile gore Morena o tla ema le nna; o tla mputsetša tše ke di dirago” (Jesaya 49:4b).

O lebeletšane le mošomo goba taelo ye o naganago gore o ka se kgone go e phetha. O ikwa o se na bokgoni gape o sa swanelege. Ka gona hlohleletšega ka mantšu a Modimo go Korese: “Ke tla go tiiša, le ge o sa ntsebe … Nna ka noši ke tla go lokišetša tsela, ka lekanetša meboto … Ke tla go fa matlotlo a a tšwago mafelong a leswiswi, le mahumo a a fihlilwego; ke gona o tlago tseba gore ke nna Morena, le gore Modimo wa Israele o go bitša ka leina” (Jesaya 45:5,2-3).

Go bao ba ipotšišago ge e ba go na le bao ba ba ratago … ee! Morena Modimo, Mmopi wa gago, o go rata kudu: “Gobane Modimo o ratile lefase kudu mo a ilego a ba a le fa Morwa wa gagwe a le noši, gore mang le mang yo a dumelago go yena a se lahlege, eupša a be le bophelo bjo bo sa felego” (Johanese 3:16).

E sa le wa nagana gore a ka nyaka go go šomiša le wena go hlahla ba bangwe? E re a go rute gore bjang.