Mo tumiše – Letšatši la 5

Ditiragalo tše ntši tše di ngwetšwego ka Bibeleng di na le bjalo ka tabataba e swango: bofsa goba mpshafatšo ya maemo, kudukudu a batho. Re bala ka se la pele go Genese ge Modimo a hlola seetša go raka leswiswi. Se hlodile polatefomo ya bophelo bjo boswa: dibjalo, dipeu, diphoofolo, dinonyana, diphedi tša ka meetseng gomme ka letšatši la boselela sebopiwa se se dirilwego ka seswantšho sa Modimo – batho.

Go wa, lega go le bjalo, go amile tlholo e mpsha-mpsha ya go sa felego; go felela ga yona le phethagalo tša ba le diphošo. Thwadi ya tlholo ya Modimo – batho – e amegile kudu. Ba rakwa bogoneng bja Modimo. Go tloga ka nako yeo go ya pele, tumo, sebe, go se phethege, dihlong, tsholo, lehu le go se phele go ya go ile ya ba ditlamorago tša go se obamele ga bona.

Eupša Modimo ga a makatšwa ke ditiragalo tše. O tšere kgato ya go bušetša leswa seswantšho sa batho le go ba dumelela go phela gape tswalanong le yena. Go Kriste o abile bophelo bjo boswa, bjo bo sa felego le Yena. Bjang? “… Modimo o boelanya batho ba lefase le yena ka Kriste. Ga a ba balele dibe tša bona, le gona o re laetše go botša batho ka mo a ba boelanyago le yena ka gona” (2 Bakorinte 5:19). Ye ke tsela e mpsha ka nnete: Yo mongwe – Morena Modimo – o kgethile go bušetša leswa tswalano le batho bao ba anantšego tswalano le Mohlodi wa bona le boithati bja bona!

Ka poelano ye dilo tše pedi tše mpsha di a direga: Bjale o wa Kriste, gomme o motho yo moswa, sebopiwa se sefsa. Baroma 6:4,11 e hlaloša go tswala lefsa bjalo ka go hwa sebeng gomme o tsošwa go phela bophelo bjo bofsa o phelela Modimo go Kriste. Go 2 Bakorinte 5:17 o akaretša ditiragalo tše: “Ka lebaka leo, ge motho e le wa Kriste e ba sebopiwa se sefsa; tša kgale di fetile, go tlile tše difsa.”

Batho ba ba lego go Kriste ba phela bjang maphelo a bona goba ba ikgafile bjang go hlankeleng Morena ga go sa ahlolwa ke melawana le melao ye ba e obamelago, eupša ka fao ba dumelago go hlahlwa ke Kriste ka tsela e mpsha ya Moya (Baroma 7:6) le ka fao batho ba obamelago go hlahlwa ke Moya wo Mokgethwa (Bagalata 5:6). Se ke sephiri go phetogo ye e tšwelago pele le go phela letšatši le lengwe le le lengwe bjalo ka motho yo moswa.