Mo tumiše – Letšatši la 10
Tshepha Morena
(Di)temana ya Bibele
JESAYA 50
Modimo ka boyena o hlatsetša gore Jobo ke monna wa go loka wa go hloka bosodi yo a mmoifago le go se dire tše mpe (Jobo 1:8). Se ga se ya mo thibela go ka lekwa le go itemogela tlhophego e kgolo ka nako ya gagwe ya go phela. O ile a tšeelwa mehlape ya gagwe; badiši ba gagwe ba bolawa ke legadima. Bana ba gagwe ka moka ba bolawa ka letšatši le tee gape mmele wa gagwe wa tšwa dišo tše šoro. Bagwera le mosadi wa gagwe ba mo hlanogela.
Jobo o dira se le rena re swanetšego go se dira: o llela go Modimo. O mmotša gore ga a na molato – selo se o ka se dirago ge wena, bjalo ka Jobo, o phela ka toko le go rata Morena. Jobo o dumela gore ga a swarwe gabotse, eupša selo se tee se Jobo a sa se dirago ge a bolela le Modimo ke gore: “… ga se a ka a dira sebe ka go sola Modimo” (Jobo 1:22).
Dilo tše mpe di a direga go badumedi ba Bakriste, le ge, go robegeng ga rena, re rata Morena ka nnete gomme re ikgafile go mo hlankela. Gantši ke ka dinako tše tše boima moo batho ba botšišago go ba gona ga Modimo maphelong a bona le go ipotšiša ge e ba ba dirile phošo go ka itemogela diteko tše bjalo le ditlhophego. Gantši ba botšiša ka mo go kwagalago ge e ba go na le mohola go hlankela Modimo.
Nnete ke gore ga re na tiišetšo ya gore re ka se itemogele mathata. Ge e le gabotse, Bibele e re diteko ke karolo ya leeto la semoya gore tumelo ya rena e lekwe, gore re ithute go kgotlelela (Jakobose 1:3). Jobo o lemogile nnete – o a tseba gore o a hlophega go sa šetšwe lebaka la gore ke moloki. Le wena o ka ikhwetša ka gare ga maemo ao o palelago ke go a kgotlelela. Tia maatla ka gobane …
Ka ntle le Jobo, Jesaya o ile a atelwa ke manyami, gomme a botšiša: “Lena ba le boifago Morena gape le theeletšago mantšu a mohlanka wa gagwe?” Gomme o araba ka gore: “le ge le sepela swiswing le sa bone seetša, le tshephe Morena” (Jesaya 50:10).
O a kwa? Sa pele, o ka tshepha leina la Morena ka gobane “Morena o bjalo ka tora ye e tiilego yeo moloki a ka tšhabelago go yona a bolokega” (Diema 18:10). Sa bobedi, o ka bota Modimo wa gago. O a tshephega, ke Mothuši wa gago, o kwa dillo tša gago gomme o a go matlafatša, ka gobane “… ke yena Morena a nnoši” (Markose 12:29).
