Bible Society of South Africa
Dithulaganyo tša go bala
Matšatši a šupa a tutuetšo go tšwa go Kutullo
Matšatši a šupa a tutuetšo go tšwa go Kutullo - Letšatši la 5
Gerhard Lindeque

Matšatši a šupa a tutuetšo go tšwa go Kutullo - Letšatši la 5

Tsoga!

(Di)temana ya Bibele

KUTOLLO 3

Molaetša wa go ya Sardese

1“Ngwalela morongwa wa Modimo wa phuthego ya Sardese o re:

“Yo a nago le meoya ye e šupago ya Modimo le dinaledi tše di šupago o re: Tše le di dirago ke a di tseba; ke a tseba gore batho ba re le a phela, etšwe le hwile. 2Ka gona, itsošeng, le tsošološe dimpho tša Sekriste pele di hwela ruri. Gobane ke lemogile gore tše le di dirago ga sešo ya ba tše di lokilego go felela mahlong a Modimo wa ka. 3Ka gona, gopolang ka mo le ilego la theeletša Taba ye Botse ya Modimo ka mafolofolo mola le e kwa, gomme le e boloke, le sokologe. Ge le sa itsoše ke tla le wela godimo bjalo ka lehodu le sa itebetše, ebile le ka se tsebe nako ye ke tlago go le wela godimo ka yona. 4Eupša go na le ba mmalwa moo ga gabolena, Sardese, ba ba sego ba tšhilafatša diaparo tša bona. Bona ba tla sepela le nna ba apere diaparo tše ditšhweu, ka ge go ba swanetše. 5Yo a ka fenyago le yena o tla apešwa diaparo tše ditšhweu, gomme nka se phumole leina la gagwe pukung ya ba ba phelago. Ke tla begela Tate le barongwa ba gagwe gore yoo ke wa ka.

6“Yo a nago le tsebe a a kwe se Moya o se botšago diphuthego.”

KUTOLLO 3:1-6NSO00Bula go Mmadi wa Bibele

Modimo o swanetše go bolela le rena ka go hlaboša lentšu, go re tsoša. Bjalo ka diphuthego tše dingwe, kereke ya Sardese karolong ye, gape e emela kereke ya dinako ka moka le maemo a tlwaelegilego ao ka dinako tše dingwe a diregago ka kerekeng. Bjo bongwe bja ona ke gore ka dinako tše dingwe, go ka bonagala eka kereke e a phela ge, ge e le gabotse, e hwile semoyeng. Bothata ke gore phuthego e ka bonagala e phela mahlong a batho, eupša mahlong a Modimo ge e le gabotse e hwile semoyeng. Ga ba tsebe Modimo gomme ga ba phele tswalanong le yena.

Le ge go le bjalo, Modimo ga a tlogele kereke. Modimo o hlokomela kereke ka Moya wa gagwe le ka go rera lentšu la gagwe. Kereke e lemošwa gore e tsoge. Se se re gopotša ka seswantšho sa dikgarebe le mabone a tšona, tšeo di bego di sa letela go fihla ga monyadi. Moo batho ba hlokomologago tswalano ya bona le Modimo, e ama pelo ya kereke. Gomme, go bohlokwa go boela go melawana ya motheo ya ebangedi – taba ye botse ya kgaugelo ya Modimo le lerato.

Go hwa semoyeng ga go bušetšwe morago ka go dira diphetogo tša boikaketši. Go fetoga fela ge re lemoga gore ke fela ka kgaugelo ya Modimo mo re hlatswago dibe. Se se emelwa ke diaparo tše šweu. Ke tokelo ye e sa hlalošegego gore maina a rena a tla ngwalwa go ya go ile ka pukung ya bophelo. Re lebaletšwe ke Jesu Kriste gomme re ba gagwe go ya go ile. Ga go selo goba motho yo a ka re tšeelago seo.

Nagana ka:

  1. 1.Tswalano le Modimo e hwa bjang?
  2. 2.Ke eng motheo wa tswalano ya rena le Modimo?
  3. 3.Na re swanetše go phela ka poifo ya go boa ga Jesu?

Bible Society of South Africav.4.26.9
RE HWETŠE GO