Mathomo a maswa – Letšatši la 8

Mengwaga e mmalwa ya go feta, maphodisa a Italy a golegile monna morago ga go hwetša kwena ya Cuba ya mengwaga ye meraro e thuntha ka gare ga pafo ya gagwe ya go hlapela. Ge e godile, kwena ye e ka ba ya botelele bja dimetara tše tharo.

Mong wa kwena o e šwahlišitše ka nageng e sa le lee, gomme la phaphaša gae. Ditsebi tša diphoofolo tša lešoka, tšeo di ntšhitšego segagabi seo ka ntlong, di rile go be go tlo ba boima go ntšha kwena ye nakong e tlago, ka ge e tsebja bjalo ka kwena ya lefase e bohlale, ya lebelo gape e bogale. Mong wa yona o lefišitšwe £70 000 (go feta R700 000 ka nako yeo) ka koketšo ya kgonagalo ya ngwaga o tee kgolegong ka bosenyi bjo.

Maphelong a rena, diphiri tše utilwego goba dibe tša ka sephiring di ka swana le kwena ye. Mathomong re nagana gore, bjalo ka ge mong wa kwena a dirile, re ka uta dibe tša rena tša ka sephiring go lefase. Kotsi, le ga go le bjalo, ke gore lee le tla phaphaša le gore kwena e tla gola go fihlela e se sa laolega.

Ke “dikwena” dife tše o di utelago lefase lehono? Temalelo ya gago (go dijo, go diokobatši, go petšheng le bjala)? Go rata ga gago go seba? Go fela pelo goba mantšu a go kweša bohloko, a go goboša go bao o ba ratago? Naa o uta tlhokomelo ye o e hwetšago goba go efa motho ka ntle ga lenyalo? Naa o a lemoga gore Modimo o bona tšohle?

Theeletša mantšu go Jobo 11:11: “Baikaketši Modimo o a ba tseba; o lebelediša mediro ya bona ye mebe.” Go tlaleletša, go Baheberu 4:13: “Ga go sebopiwa se se širegelago Modimo; tšohle di a mo utologela tša ba pepeneneng. Ke yena yo re swanetšego go ikarabela go yena.”

Modimo o nyaka go go thuša go ntšha dikwena ka moka bophelong bja gago, ka ge a tseba gore ke tshenyo efe ye di kago e dira. Ke ka lebaka la eng o sa kgopele Yena go go matlafatša ka Moya wa Gagwe wo Mokgethwa gore o tloge go tšona? Ke na le nnete ya gore ga o nyake go lefišwa, go ya kgolegong goba kwena e kitima ka ntle taolo legaeng la gago! Modimo a go šegofatše.