Mathomo a maswa – Letšatši la 7

Ka Labohlano la 13 Pherekgong 2012, balekani ba Afrika Borwa, Laurence Davis le mosadi wa gagwe, Andy, ba fihlile go yo ja dijo tša mantšiboa go e tee ya mabenkele a go jela sekepeng se segolo sa manobonobo sa Italy, Costa Concordia. Ka bo-21:45, ba kwele lešata le legolo ge sekepe se betha letlapa kgauswi le sehlakahlaka sa Giglio. Go bile le tlhakatlhakano ge banamedi le bašomedi ba be ba leka go tsena ka gare ga diketswana tša tlhakodišo.

Ge balekani ba Devis ba lemoga gore meetse a lewatle a be a tsena ka sekepeng, ba tsebile gore ba swanetše go fologa. Lawrence a lokela digalase tša gagwe ka morabeng wa gagwe, a swara mosadi wa gagwe ka letsogo gomme ba taboga go bogodimo bja mabato a mane ba tabogela ka gare ga meetse a lewatle a go tonya wa lehlwa. Morago ga fa, ba rutha dimetara tše 100 go ya go sehlakahlaka sa kgauswi moo ba katanego metsotso ye 45 go ka feta maswika go ya nageng. Sebaki sa kotsi go dumelwa gore ke go se hlokomele ga Molaodi wa sekepe wa Mogerike, Francesco Schettino, ka ge sekepe se be se phamogile tseleng ka dikilometara tše tshela. Ka Lamorena, palo ya mahu e be e le 5, mola banamedi ba 27 le bašomedi ba be ba sa timetše. Palo ya mahu ya mafelelo e bile 34.

Ge re sa obamele Modimo, re mo kgoromeletša kgole ka lebaka la pefelo goba re dumelela selo se sengwe go ba bohlokwa maphelong a rena go feta Yena, re ba bjalo ka Costa Concordia, re phamoga tseleng. Kotsi ka go dira se ke gore le rena re ka betha maswika ao a ka bakago tshenyo e kgolo maphelong a rena.

Naa o ikwa ka tsela ye lehono? O le kgole le Modimo mo o se nago le sebete sa go boela go Yena. Naa o swaregile kudu ka gare ga meetse a lehlwa a ditlhohlo mo e lego gore ga o sa na kholofelo ya go ka fihla nageng o bolokegile? Theeletša gape mantšu go Ditiro 3:19: “Ka gona, itsholeng le sokologe gore le phumolwe dibe tša lena …” Gomme go Jesaya 35:4 go ngwadilwe gore: “Ebang le sebete, le se ke la boifa! … o tlilo le hlakodiša.”

Modimo o nyaka go re thuša bothateng bjo bongwe le bjo bongwe maphelong a rena. Se re hlokago go se dira ke go sokologa dibeng tša rena goba go se obamele ga rena, re amogele Jesu Kriste bjalo ka Mophološi le go kgopela Moya wo Mokgethwa go re hlahla letšatši le letšatši ge re tšwela pele morerong wa Modimo wa maphelo a rena. Ge re ka dira se, re tla itemogela ka mo Modimo a re ntšhago ka gare ga meetse a lehlwa le go re bea ka gare ga seketswana sa Gagwe sa tlhakodišo, a le gare a re gopotša ka bokamoso bjo bo botse bjo a šetšego a bo rulagantše bja rena. Se letele maswika. Dira sephetho seo lehono. Modimo a go šegofatše.