Mathomo a maswa – Letšatši la 5

[Bokamorago: Ke neng la bofelo moo o tshephilego Modimo ka katlego ye e phagametšego tlhago? Mo ke bopaki go tšwa go babadi ba Temana ka Letšatši ba paka ka boloki bja Modimo.]

Mmadi wa 1, Brenda: “Mathomong a ngwagola, nna le monna wa ka re nyamile kudu ge re hwetša gore koloi ye re e rekilego bjalo ka mpho ye e bego e sa letelwa ya letšatši la matswalo la morwa wa rena yo a bego a fetša mengwaga ye lesomeseswai e utswitšwe ka karatšheng – matšatši a mmalwa pele ga letšatši la gagwe la matswalo!
Le semeetseng ra tsebiša maphodisa. Le ge go le bjalo, ge letšatši le dikela, menyetla ya go hwetša koloi e ile ya sesefala kudu. Ba bangwe ba bagwera ba rena ba lekile go re kgothatša ka go bolela gore re swanetše go amogela gore re ka se sa e hwetša gape. Moagišani wa ka le nna, le ge go le bjalo ra tšwela pele go rapelela mohlolo. Ka go lebanya ra kgopela Modimo go dira gore mahodu a se be le khutšo gore ba bušetše koloi go rena. Go batho ba bantši seo se be se kwagala bjalo ka bošilo!
Mesong ya letšatši la matswalo la morwa wa ka, ke ile mošomong gomme ka gare ga koloi, ka rapela: ‘Morena, o a tseba gore re be re nyaka go mo fa koloi lehono. Eupša le ga bjale, ke a tseba gore o laola maemo …’ Ka iri ya bone mathapama, ge re fihla gae, moagišani a re tsebiša gore maphodisa a fihlile pejana ka lona letšatši leo, a re nyaka. Ra ba founela le semeetseng. Ditaba? Ba hweditše koloi ya morwa wa ka ye e bego e utswitšwe mosong woo, e phakilwe pele ga seteišene sa maphodisa kua Macassar, motse wo o bapilego le mmila wa N2 ka ntlenyana ga Cape Town. Dinotlelo di be di le ka gare ga koloi gomme go itaetša o ka re mahodu a e tlogetše fao gomme a sepela! Re fa Modimo letago ka moka! O dirile gore tše di sa kgonegego di kgonege.”

Mmadi wa 2, Bernadette: “Morwedi wa ka ke moithuti kua Yunibesithi ya Kapa Bodikela (UWC) gomme o swanetše go ingwadiša beke ye. Le ga go le bjalo, ga ke na tšhelete ye e lekanego, ke dira dilo ka moka ka maatla a ka go mo thuša ka gobane o nyaka go hwetša tikrii. Nakong ya go feta, ke šomišitše ponase ya ka ya mafelelo a ngwaga o mongwe le o mongwe go lefela tšhelete ya boingwadišo. Le ge go le bjalo, ge re bona gore mothwadi wa rena ga a lefela diponase mafelelong a ngwagola, morwedi wa ka o be a tshwenyegile kudu beke ka moka. Ke be ke phela ke mmotša gore: ‘Se tshwenyege. Modimo o tla re direla tsela.’

Maabane re amogetše emeile go tšwa go yunibesithi, e re tsebiša gore morwedi wa ka o atlegile kgopelong ya gagwe ya pasari. Ka gona, ga a swanela go lefela selo! Ke ile go mo ngwadiša moragonyana lehono. Ke leboga Modimo ka ge a re hlokometše!”

Brenda le Bernadette bobedi ba nepile. Ga go se se palelago Modimo. Theeletša gape mantšu go Baefeso 3:20-21: “Yena a kgonago go dira tše di fetago kudu tše re kago di kgopela goba ra di nagana, ka maatla a gagwe a a šomago mo go rena, a a tumišwe ke ba meloko yohle ka kerekeng le go Kriste Jesu go ya go ile! Amene.”

O tshepha Modimo ka eng lehono? Gopola, ga go selo se e lego se segolo goba se se sa kgonegego seo Modimo a ka sa se fetolego. Bjalo ka Bernadette le Brenda, na o tla tšwela pele go tshepha Modimo go fihla o amogela katlego ya gago? Modimo a go šegofatše.