Mathomo a maswa – Letšatši la 4

Naa go na le dikholofetšo bophelong bja gago tše Modimo a go filego tšona kgale, eupša ga di ya phethagatšwa ga bjale? Naa o rapelela ngwana, katlego ya ditšhelete, poelano le motho yo o mo ratago, kaonafatšo ya tikologo ya go šoma goba phodišo go bolwetši. Mathomong, o be o kgothetše ge o rapela, eupša ge o swanetše go bolela nnete, o thoma go belaela gomme o ipotšiša ge e ba o tla amogela katlego ya gago.

Theeletša gape mantšu go Numeri 23:19: “Modimo ga se motho a kago bolela maaka; ga se motho, yo a kago itshola. Se a se holofetšago o a se dira; o a bolela, mme gwa phethega.”

Pukung ya Promissio und Bund, mongwadi Bertold Klappert o ngwetše gore: “Modimo ga a dire ka tsela ye e fapanego go rena go e na le se se ngwetšwego Lentšung la Gagwe. Gomme batho ba ka se leke go dira ka tsela ye e fapanego go Modimo go e na le se se ngwetšwego Lentšung la Gagwe.”

Lentšu la Modimo le dikholofetšo tša gagwe ga di fetoge. Abrahama o be a na le mengwaga ye 100 gomme mosadi wa gagwe, Sara, ye 90 ge kholofetšo ya ngwana e phethagatšwa. Moshe o be a na le mengwaga ye 80, gomme e le modiši lešokeng, ge Modimo a bolela le yena ka mošwana, go mo romela go yo lokolla Israele nageng ya Egepeta. Go oketša moo, Gidione o ile ntweng ka bahlabani ba 300 fela a elwa le bahlani ba bantši, ka gobane o dumetše go kholofetšo ya Modimo ya tšhireletšo le phenyo – ye e diregilego.

Ka Modimo, ga gona magomo. Nako ya gagwe ka mehla e phethagetše. Ge o tšwela pele go tshepha Yena, o ema Lentšung la gagwe le go lwantšha dikgopolo dife goba dife tše di dirago gore o belaele, ke go netefaletša gore katlego ya gago e tlo direga ka nako ya maleba. Gomme go tseba mang, mohlomongwe lenyaga e ka ba ngwaga wo o amogelago katlego ya gago!