Mathomo a maswa – Letšatši la 15

[Bokamorago: Ke abelana gape ka maitemogelo a babadi.]

 Mmadi wa 1, Koos: “Ka 2003, ke šometše khamphani kua Douglas. Bjalo ka karolo ya boikarabelo bja ka, ke be ke swanetše go bula phaphoši ya bobolokelo mesong ye mongwe le ye mongwe gore bašomedi ba tsene. Ke be ke na le setlwaedi sa go phaka koloi pele ga phaphoši ya bobolokelo gomme morago ke tla e tloša ka e iša mo e bego e phaka gona ka mehla.
Mesong ye mongwe, mothwadi wa ka o nkgopetše gore ke mo felegetše go dikliente. Koloi ya ka e be e sa phakile pele ga phapoši ya bobolokelo. Ge re boa, ke be ke nyaka go tloša koloi ya ka, eupša ka pejana ka lemoga gore dinotlelo di timetše!
Ra thoma go nyakela dinotlelo gohle, ka ntle le katlego. Go befediša ditaba pele, dinotlelo tša ka tše dingwe di be di le gae gomme dinotlelo tša ka tša ntlo di be di le ka koloing. Ka rapela Modimo ke tlaletše gore a ntaetše moo dinotlelo tša ka di bego di le gona.
Ge ke robala bošego bjoo (morago ga gore ke tsena ka ntlong ka nthobana), ke bile le toro. Torong yeo, ka bona ditiragalo tša letšatši leo. Ka ipona ke otlela ke eya mošomong, ke bula phapoši ya bobolokelo gomme ke tsena ka koloing ya mothwadi wa ka. Ge re sepela, ka bona dinotlelo tša ka di wela fase go tšwa ka morabeng wa ka, di wela ka morago ya setulo sa mootledi ka fase ga mmete.
Mesong e latelago, ke kopane le mothwadi wa ka ka myemyelo e kgolo. Ge ke mmotša ka toro ya ka, mathomong a sega. Le ge go le bjalo, ka bula lemati la koloi ya gagwe, ka goromeletša setulo pele gomme ka tloša mmete. Ka bjako, bobedi ra buša moya ge re bona dinotlelo – bjalo ka ge ke di bone torong ya ka! Ka leboga Modimo gomme ga bjale ke a lemoga gore ke swanetše go kgopela, le go dumela, gomme Yena o tla abela!”

Mmadi wa 2, Frans: “Ka Manthole 1992, nna le bašemane ba ka ba bahlano re be re rea dihlapi lewatleng. Le ge sebara sa ka le banna ba bangwe ba tantše dielefe tše ntši, ga ke a swara selo letšatši leo. Go be go setla pelo go bona bašemane ba ka ba thabile ge ba na le banna ba bangwe, mola ke sa swara selo.

Ka ema godimo ga leswika, kgojana, gomme ka rapela Modimo gore a nthomele hlapi ye nka e tanyago. Ke sepetše gae letšatši le dikela ke se ka swara selo.
Mesong e latelago, ka iri ya 04:00 sebara sa ka o ntsošitše gomme a mpotšiša gore ga ke nyake go yo rea dihlapi. Karabo ya ka ya semeetseng e bile ‘aowa’, eupša lentšu la nkgopotša gore ke kgopetše hlapi maabane. Ke tsošitše bašemane ba ka ba babedi gomme ra yo rea dihlapi.
Thapo ya ka e bile ya pele go tšwa ka koloing. Ka bofelela segoketši gomme ka lahlela thapo mo e ka bago dimetara tše 40 ka lewatleng. Morago ga metsotso e mebedi, thapo ya ka ya gogega kudu. Sebara sa ka a tla go nna gomme a re e swanetše go ba e le šaka gomme ke swanetse go ripa thapo. Le ge go le bjalo, ka tšea sephetho sa go swarelela. Mafetšo a kanegelo? Morago ga go katana diiri, ke swere hlapi e kgolo (ya dikilogramo tše 28,5) – gomme lekga le bana ba ka ba be ba thabile kudu gomme ba ikgantšha go ema kgauswi le nna. Ge o mo kgopela se sengwe, gantši O neela tše ntši!”

Koos le Frans ba nepile. Modimo o kwa dithapelo tša rena. Go Mateu 7:7,9-11 re bala gore: “Kgopelang, gomme le tla fiwa; nyakang, gomme le tla hwetša; kokotang, gomme le tla bulelwa … Ke mang mo go lena yo a ka fago morwagwe leswika ge a mo kgopela bogobe? Goba a mo fa noga ge a mo kgopela hlapi? Ge ešita le lena le lego ba babe le tseba go fa bana ba lena tše botse, na Tatagolena wa legodimong yena a ka napa a se le phale ka go fa bao ba mo kgopelago dilo tše dibotse?”

Ga go kgopelo ye e lego e kgolo goba ye nnyane go Modimo go ka e šetša. Ka go realo, eya go Yena gomme o bolele le Yena ka tlhohlo ya gago. O na le kgahlego – le gaešita o kgopela dinotlelo goba hlapi. Modimo a go šegofatše!