Mathomo a maswa – Letšatši la 1
Mathomo a maswa … a ngwaga o moswa
(Di)temana ya Bibele
BAFILIPI 3
Go be go le mosegare wa sekgalela ge molemi le mosadi wa gagwe ba feta motho yo a bego a le ka thoko ga tsela a kgopelo baotledi ba dikoloi gore ba mo nametše a athile peke e kgolo mokokotlong wa gagwe. Molemi a emiša koloi ya gagwe gomme a nametša monna yoo. Le semeetseng a leboga gomme a namela ka morago ga koloi a le gare a myemyela, pele ba wela tsela.
Ka morago ga metsotso, molemo o lebetše ka sepili sa go bona tša morago go netefatša gore monamedi o gabotse. O ile a makala gore monamedi o dutše ka morago ga koloi gomme o sa athile peke ya gagwe e kgolo mokokotlong. Molemi a emiša koloi gomme a mmotšiša gore ke ka lebaka la eng a sa role peke ya gagwe ye a bego a e athile. Monamedi a araba, “Mohlomphegi, o dirile go tlala seatla ka go nnametša koloi. Ga ke nyake gore koloi ya gago e rwale boima bjo oketšegilego ka peke ya ka!”
Naa ngwagola e bile ngwaga o mo bjang go wena? Naa e bile ngwaga wo o bego o tletše ka ditiragalo (go beeletšwa, lenyalo, ngwana yo moswa ka lapeng goba mohlomongwe o thopile leeto la go ya mošamawatle)? Goba mohlomongwe e bile ngwaga wo o nyakago go o lebala (ka gobane motho yo o mo ratago o hlokafetše, o hladilwe, kgwebo ya gago e tswaletše goba o be o le tee ka nako ya Krisemose)?
Ka dinako tše dingwe re ba bjalo ka monamedi ka morago ga koloi ge re lebala gore Jesu o re hwetše sefapanong, go re rola morwalo wa rena (bohloko bja pelo, manyami, bohloko le dibe tša nako ya go feta) le go re fa bophelo bjo bo feletšego (Johanese 10:10). Ka gona re ka kgona go rola morwalo wa rena le go tshepha Yena ka bokamoso bjo bokaone.
Theeletša se Paulose a se ngwetšego go Bafilipi 3:13-14: “… se ke se dirago ke gore tša ka morago ga ka ke a di lebala, ka obelela tša ka pele ga ka. Ke šianela go ba thwadi gore ke yo thopa sefoka, e lego go biletšwa ke Modimo bophelong bja legodimong ka Kriste Jesu.”
Ke morwalo ofe wo o o rwetšego lehono? Ke ka lebaka la eng o sa o role magatleng a gago? Se se fetilego ke sa nako ye e fitilego. A re lebeleleng pele ka lethabo go bona se Modimo a lego kgauswi le go se dira ngwageng wo o moswa. Ka Yena, wo e ka ba ngwaga o mobotse kudu go fihla ga bjale! Modimo a go šegofatše.
