MAATLA A LEHONO – Letšatši 5

“Homotšang setšhaba sa ka,

se homotšeng!

₂Beang batho ba Jerusalema pelo!

Le ba botše gore ba tlaišegile, go lekane,

ba lefeleditše dibe tša bona.

Ke ba otlile kudu go lekana dibe tša bona.”

“Phulelang Morena tsela lešokeng!

Lekaneletšang Modimo wa rena tselakgolo nageng ye e omilego!

₄Tšheletšang meedi yohle;

lekanetšang dithaba le meboto yohle.

Mebotwana e lekanetšwe e be molala,

mme mo go sego gwa lekanela go lekanetšwe.

₅Ke gona letago la Morena le tlago utollwa,

mme batho bohle ba le bona mmogo.

O realo, Morena.”

₆Motho o a goelela o re:

“Bega!” Ka botšiša ka re:

“Ke bege eng?” A re:

“Bega gore batho ka moka ba bjalo ka bjang;

ba hwa ka pela boka matšoba a naga.

₇Mabjang a a omelela,

matšoba a a pona,

ge Morena a tliša phefo ye e a fokago.

Gabotsebotse batho le bona ba bjalo ka bjang,

ga ba phele nako ye telele.

₈Ke therešo, mabjang a a omelela,

le matšoba a a pona,

eupša lentšu la Modimo wa rena lona ke la neng le neng.”

₂₈Kgane ga le tsebe?

Ga se la kwa?

Morena ke Modimo wa go ya go ile,

Mohlodi wa lefase lohle.

Ga a lape,

ga a felelwe ke maatla.

Tlhaologanyo ya gagwe ga e fihlelwe.

₂₉O lapološa bao ba lapilego,

bao ba fokolago a ba fa maatla.

₃₀Bafsa le bona ba a lapa ba fele maatla.

Masogana le ona a a thetšwa a we.

₃₁Eupša bao ba tshephilego Morena ba tla lapologa,

ba se sa felelwa ke maatla,

ba swana le dintšhu tše di akalalago.

Ba tla kitima ba se lape,

ba sepela ba sa fele maatla.

₁Lena Baisraele,

Morena yo a le hlodilego,

yo a le bopilego,

lena ditlogolo tša Jakobo, o re:

“Le se ke la boifa –

ke le hlakodišitše.

Ke le biditše ka leina la Israele –

le ba ka.

₂Ge le tshela noka ye e išago,

ke tla ba le lena;

matshwenyego a lena a ka se le tšee bjalo ka lefula.

Ge le putla mollo le ka se tlaboge,

₃gobane nna ke Morena Modimo wa lena,

Modimo yo mokgethwa wa Israele,

yo a le phološago.

Ke tla loba ka Egepeta gore ke le lokolle;

ke tla gafa Etopia le Seba legatong la lena.

₆Retologelang go Morena a sa le file sebaka;

mo rapeleng a sa le kgauswi.

₇Bakgopo a ba lahle ditiro tša bona,

ba babe ba tlogele megopolo ya bona.

A ba sokologele go Morena,

mme yena o tla ba šokela;

ba retologele go Modimo wa rena,

ka gobane o swarela batho dibe gantšintši.

“Megopolo ya ka ga e swane le ya lena,

le ditsela tša ka di fapana le tša lena.

₉Bjalo ka ge magodimo a phagame kudu ka godimo ga lefase,

ka wona mokgwa woo ditsela le megopolo ya ka di ka godimo ga tša lena.