MAATLA A LEHONO – Letšatši 2

₁Ntšhokelwe hle, Modimo,

ka ge o nthata ka leratorato.

Phumola dibe tša ka ka kgaugelo ya gago ye kgolo.

₂Ntlhatswe bokgopo bja ka,

o ntire yo a hlatswitšwego sebe.

₃Diphošo tša ka ke a di tseba,

le sebe sa ka ke dula ke se gopola.

₄Ke phošeditše wena, wena fela,

mme ke dirile se o bonago e le se sebe.

Ka gona go a swanela ge o nkahlola.

Go lebane ge o mpona molato.

₅Ke tswetšwe ke le yo kgopo,

ke imilwe ke le modiradibe.

₆Ka ge therešo e le se se go kgahlago pelong ya motho,

nthute ka pelong ka mo ke swanetšego go phela.

₇Ntlhwekiše sebe ka hisopo,

ke mo ke tlago hlweka.

Ntlhapiše ke tage go feta leswela.

₈Nke o nkweše mekgolokwane ke boele ke thabe,

mme le ge o nthobagantše marapo ke tla buša ka thaba.

₉Budulala o se hlwe o bona dibe tša ka,

mme o phumole bokgopo bja ka bjohle.

₁₀Modimo, hle,

mpopele pelo ye e hlwekilego,

mme o ntsenye moya wo mofsa wa potego.

₁₁Se nthake pele ga gago;

se nkamoge moya wa gago wa bomodimo.

₁₂Buša o mphe lethabo la motho yo o mo phološitšego,

mme o dire gore ke rate go go theeletša,

₁Yo a lego ka lehwafeng la Ramadulagodimo,

a dulago a šireleditšwe ke Ramaatlaohle,

₂a ka re go yena:

“Ke wena setšhabelo sa ka le sebo sa ka;

o Modimo yo ke mmotilego.”

₃Gobane ke yena a go phefišago mereo ya barei le malwetši a mašoro.

₄O go šireletša ka diphego tša gagwe;

o bolokega ge o hlokometšwe ke yena.

O botegela go go šireletša le go go phemela.

₁A ke rete Morena!

A ke tumiše leina la gagwe le lekgethwa ka pelo ya ka ka moka.

₂A ke rete Morena,

ke se lebale tše a ntirelago tšona:

₃O ntebalela makgopo a ka ka moka;

o mphodiša malwetši a ka ohle.

₄O ntlhakodiša lehung;

o a ntlhompha, a nthata, a ntšhokela.

₅Bophelong bja ka ka moka

o mpha tše botse ka bontši,

gore ke no fela ke tiile,

ke le yo mofsa bjalo ka ntšhu.