Khomotšo go tšwa Lentšung – Letšatši 38

₁Morena ke seetša sa ka le Mophološi wa ka –

nka se boife motho.

Morena ke botšhabelo bja ka –

nka se tšhoge motho.

₂Ge batho ba babe ba ntlhasela gore ba mpolaye,

e lego bona batlaiši le manaba a ka, go thetšwa bona ba wa.

₃Le ge madira a ka ntikanetša,

nka se ke ka boifa;

le ge manaba a ka ntlhasela,

ke tla no fela ke botile Modimo.

₁Anke Morena a go arabe tšatšing la tlalelo!

Modimo wa Jakobo a go šireletše!

₂Anke a go thuše a le Felong mo Gokgethwa;

a go thekge a le thabeng ya Sione.

₇Batho ba bangwe ba botile dikoloi tša ntwa,

bangwe ba botile dipere tša bona;

ge e le rena re botile Morena Modimo wa rena.

₈Bona ba a thetšwa ba wa,

fela rena re ema re hlophologile,

re tiile.

₉Morena, dira gore kgoši a fenye,

le rena ge re go bitša o re arabe.

₁Go Modimo fela ke mo ke hwetšago khutšo;

ke yena yo a mphološago.

₂Ke yena fela sebo sa ka le Mophološi,

ke yena setšhabelo sa ka,

nka se tsoge ke thetšitšwe.

₅Nna khutšo ke e hwetša go Modimo fela,

ke yena yo ke mo tshephilego.

₆Ke yena fela sebo sa ka le Mophološi,

ke yena setšhabelo sa ka,

mme nka se thetšwe.

₇Modimo ke Mophološi wa ka yo a mphago seriti;

ke yena sebo sa ka se se tiilego,

ke setšhabelo sa ka.

₈Mo tshepheng ka mehla,

lena setšhaba;

mo aleleng mathata ohle a lena;

ke yena setšhabelo sa rena.

₃Ge ke ikwa ke boifa,

ke bota wena.

₄Ke botile Modimo yo ke mo tumišago ka lebaka la tše a nkholofeditšego tšona,

gomme ga ke boife selo –

motho wa nama yena a ka ntirang?

₈O tseba ka mo ke tshwenyegilego ka gona.

Tšhela meokgo ya ka ka lekukeng la gago.

A ke re e ngwadilwe pukung ya gago?