Khomotšo go tšwa Lentšung – Letšatši 37

₂Morena o tsošološa Jerusalema;

o kgoboketša mathopša a Israele.

₃O homotša ba ba nyamilego,

o ba kgothatša manyaming a bona.

₄O beile dinaledi ka palo ya tšona,

a thea ye nngwe le ye nngwe leina.

₅Mong wa rena ke yo mogolo,

yo maatlamaatla,

bohlale bja gagwe ga bo elwe.

₆Morena o babalela banyatšegi,

bakgopo bona o a ba kokobetša.

₄₉O se lebale se o nkholofeditšego sona,

nna, mohlanka wa gago;

ke sona se se mphilego lehutšo.

₅₀Ge ke le tlalelong, se se nkhomotšago ke gore se o nkholofeditšego sona se a mphediša.

₁Morena, nna ga ke ikgantšhe,

goba ka hlaetša ba bangwe mahlo.

Ga ke ipofe ka dilo tše di mphetago,

goba tša go nkgakgamatša.

₂Nka upša ka thekga ditho ke ikhomoletše,

ka fola maswafo go etša lesea le le tshwešitšwego letswele difarong tša mmalo.

₃Baisraele, botang Morena,

go tloga bjale le go ya go ile.

₁Mola Morena a re bušetša Sione re etšwa bothopša,

e be nke re a lora.

₂Re be re sega re gobela;

ke ge baditšhaba ba re:

“Morena o ba diretše tše dikgolo.”

₃Le bjale, Morena o re diretše tše dikgolo,

gomme ra thakgala.

₄Morena, re bušetše nageng ya gaborena,

go etša ge o bušetša meela leganateng.

₅Ba ba bjalago ba lla,

ba tla buna ba gobela.

₆Yo a yago mašemong a lla a rwele peu,

o tla boa a gobela a rwele puno.

₁Retang Morena,

retang leina la Morena!

Mo reteng,

lena bahlanka ba gagwe,

₂lena le letetšego ka ntlong ya gagwe,

ka dikgorong tša Tempele ya yena Modimo wa rena!

₃Retang Morena,

gobane ke yo botho;

mo opeleleng ditumišo,

gobane o lokile.

₄O ikgethetše Baisraele,

ditlogolo tša Jakobo,

ya ba lefa la gagwe.

₅Ruri, nna ke tseba ge e le yo mogolo;

Mong wa rena o feta medimo yohle.

₆O dira se a se ratago legodimong le lefaseng,

ka lewatleng le ka madibeng a lona.

₇Ke yena a hlomago maru kua bogomapono,

o neša pula ya dikgadima,

o fokiša phefo go tšwa mo a e bolokago gona.

₈Ke yena wa go gagara maitšibolo a Egepeta,

a batho le a diruiwa.

₉Ke gona mo a dirilego mehlolo le dimakatšo

tša go otla kgoši le bahlankedi bohle ba yona.

₁₀A gagara ditšhaba tše dintši,

a bolaya le magoši a maatla.

₁₁Ke bona boSihone, kgoši ya Baamore,

le Ogo, kgoši ya Bashane,

le magoši ohle a Kanana.

₁₂Naga tša bona a di abela Baisraele,

tšhaba sa gagwe,

ya ba lefa la bona.

₁₃Morena, ke wena wa go sa felego;

o tumile go ya go ile.

₁₄Morena o dira tšhaba sa gagwe ka toka,

o šokela bahlanka ba ba gagwe.

₁₅Medingwana ya baditšhaba ke ya silibera le ya gauta;

ke ya go bopša ke batho ka diatla.

₁₆E na le melomo, fela ga e bolele;

e na le mahlo, fela ga e bone.

₁₇E na le ditsebe, eupša ga e kwe;

go hema le gona ga e heme.

₁₈Babopi ba yona ba tla swana nayo,

le bohle ba ba e botilego.

₁₉Lena tšhaba sa Israele,

retang Morena!

Lena lešika la Arone,

retang Morena!

₂₀Lena lešika la Lefi,

retang Morena!

Lena ba go boifa Morena,

mo reteng!

₂₁Mo Sione a go retwe Morena,

yena wa go dula Jerusalema.

Retang Morena!

₁Morena ke modiši wa ka;

ga ke hloke selo.

₂O nkhutšiša mafulong a matala;

o nkiša meetseng a makhutšo.

₃O a ntapološa,

o ntshepediša ka tsela tše di lokilego ka lebaka la leina la gagwe.

₄Le ge nka sepela molapong wo o šiišago,

nka se boife selo,

gobane wena, Morena, o na le nna.

O ntšhireletša ka molamo wa gago,

ka lepara la gago wa ntlhahla.

₅O ntirela monyanya manaba a ka a ntebeletše;

o nkamogela mo nkego ke moeng yo mogolo,

wa ntlaletša senwelo wa go falala.

₆Ke a tseba gore botho le lerato la gago di tla ba le nna bophelong bja ka ka moka,

gomme ke tla dula ka ngwakong wa gago ge ke sa phela.