Khomotšo go tšwa Lentšung – Letšatši 28

₂Go lehlogonolo motho yo Morena

a sa mmonego molato,

yo a se nego bofora.

₃Mola ke sa ipolele dibe tša ka,

marapo a ka a be a fokola,

ka gobane ke be ke ehlwa ke lla letšatši ka moka.

₄O nkotlile bošego le mosegare, Morena;

ke be ke feletšwe ke maatla bjalo ka meetse ge a pšhešwa ke phišo ya selemo.

₅Ke ile ka ipolela dibe pele ga gago,

ka se ute bobe bja ka.

Ke ithaopile ka ipolela makgopo a ka go wena,

mme wena wa ntebalela melato yeo.

₃Ka ge o nkgalefetše ke tšwile dišo gohle mmeleng,

ke opša le ke marapo ka lebaka la dibe tša ka.

₄Ke kgangwa ke makgopo a ka;

ke morwalo wo o mpalelago.

₅Dišo tša ka di a nkga,

di dutla boladu ka lebaka la botlaela bja ka.

₆Ke kudupane, ke kokoropane,

ke hlwa ke lla letšatši ka moka.

₇Ke tletše dišo gohle mmeleng;

mmele wa ka o a fiša ka letadi.

₈Ke feletšwe ke maatla,

ke nolegile moko,

ke tsetlišwa ke manyami.

₉Mong wa ka, o tseba tlhologelo tša ka,

o kwa metsetlo ya ka.

₁₀Pelo ya ka e thebatheba kudu,

ke feletšwe ke maatla,

le mahlo a ka a fifetše.

₁₁Bagwera le bakgotse ba ka ba nkatologile ka lebaka la bolwetši bja ka;

le ba gešo ga ba mpatamele.

₁₈Ke ipolela bokgopo bja ka,

ke tshwenyegile ka lebaka la dibe tša ka.

₂₂Itlhaganele o nthuše, Mong wa ka,

Mophološi wa ka!

₁Modimo,

go tumišwa go lebane wena kua Sione;

ke wena o lebanwego ke go phethelwa dikeno,

₂wena yo o kwago dithapelo.

Batho bohle ba tla tla go wena

₃ka lebaka la dibe tša bona.

Re imelwa ke dikarogo tša rena,

eupša wena o re lebalela tšona.