Kholofelo e mpsha (Karolo ya 2) – Letšatši la 2

Hlakola e tsebja kudu bjalo ka kgwedi ya lerato. Dipharologantšho tša ditswalano (tša lerato goba le ngwana wa gago, mošomi-gotee goba mmatswale), le ge go le bjalo, ka dinako tše dingwe di ka ba le mathata. Lehono, ke araba dipotšišo go tšwa go babadi tabeng ye:
POTŠIŠO YA 1: “Ke šetše ke na le mengwaga ye 40. Naa nka holofela go ka ba le molekani?”

Ka Modimo, ga go na go feta ke nako ya go hwetša molekani wa maleba. Morwa wa Abrahama, Isaka, o be a na le mengwaga ye 40 ge a nyala Rebeka (Genese 24 le 25). Ka gobane lenyalo ke mošomo o montši gomme Modimo o nyaka go go nolofaletša lona, ka dinako tše dingwe o tla lokiša semelo sa gago pele a go romela go molekani wa maleba.

Go Diema 3:5-6 re bala gore: O tshephe Morena ka pelo ya gago ka moka. O se ke wa tshepha kwešišo ya gago. Ge o sepela le Modimo le go mo amogela sephethong sa gago sa molekani, o ka ba le nnete ya gore o tla laola dikgato tša gago.
Gape, ge o sa na le morwalo wa nakong e fetilego wo o bakago lepheko tseleng ya gago, kgopela Modimo go go thuša ka seo. O ka se tsebe, wo e ka ba ngwaga moo a go makatšago ka molekani yo kgale o bego o mo lora.

POTŠIŠO YA 2: “Go thweng ge e ba ke nyalana le motho yo a a sa dumelego?”
Naa e sa le wa bona motho yo a sa dumelego a dumela ge o mo hlodia? Ga se ka mmona. Se ke se bonego, ke ka fao Modimo a ka fetošago maphelo ka maatla a phagametšego tlhago ge re thoma go rapelela ba re ba ratago bao ba sa tsebego Modimo. (Se se direga gape go rapeleleng bana ba e lego marabele, mošomi-gotee wa go felafela pelo goba maloko a lapa bao ba sa tsebego Modimo.)

Go 1 Petrose 3:1-2 re bala gore: Le lena, basadi, le ikokobetše go banna ba lena, gore ge go na le ba ba sa dumelego lentšu la Modimo ba tle ba sokollwe ke maitshwaro a lena ntle le polelo, ge ba tla be ba bona mesepelo ya lena ye e hlwekilego, le ka mo le ba hlomphago ka gona.
Go e na le go sola le go lwa, thoma go rapela gore Modimo o tla dira mošomo ka Moya wa gagwe le go tsepelela go bontšha lerato la Modimo ka mediro ya gago. Seo se ka dira phapano ya lefase.

POTŠIŠO YA 3: “Naa motho yo a hladilwego a ka holofela monyetla wa bobedi wa lethabo bophelong?”
Go Jesaya 1:18 re bala gore: “Bjale etlang re sekišaneng molato wa lena. Le ge le hwibitše perr ka dibe tša lena, le tla šweufala twaa! Le ge le re hwibii, le tla šweufala pšoo!” Ge e ba Modimo o file mmolai le segwebakathobalo monyetla wa bobedi wa lethabo bophelong, re bomang go bolela gore a ka se nee monyetla wa bobedi go motho yo lenyalo la gagwe la pele le sa šomago?

POTŠIŠO YA 4: “Naa go na le keletšo e e šomago go ditswalano tše kaone?”
Ditlhahlo tša ka di tšwa go 1 Bakorinte 13.

1. 1.Lerato ga le felele motho pelo: Naa wena, ka dinako ka moka, ga o felele molekani wa gago pelo, bana ba gago le bašomi-gotee ba gago goba o selekega ka pela?
   2. Lerato ke le botho: Naa o yo botho gaešita le ge o na le lebaka la go selekega?
   3. Lerato ga le na mona: Naa o keteka dikatlego tša ba bangwe goba o ba le mona?
   4. Lerato ga le ikgantšhe: Naa o motho yo bohlokwa kudu bophelong bja gago goba o kgona go bea dinyakwa tša ba bangwe pele go tša gago?
   5. Lerato ga le selekege fela: Naa o befela ka pela goba go selekega ka dilo tše nnyane goba go ba le pono e nepagetšego goba go se dire selo se segolo ka phošo e nnyane?
   6. Lerato ga le sware motho ka pelo: Naa o lebala ka pela goba o gopotša ba bangwe, kgafetšakgafetša, ka diphošo tša bona tša nakong e fetilego?
   7. Lerato le kgotlelela tšohle, le dumela tšohle, le holofela tšohle, le pelotelele go tšohle: Naa o khupetša diphošo tša ba bangwe goba go kgotlelela dinakong tše boima goba o a ineela?

Ditswalano tše botse di thoma ge re duma go ba molekani, mogwera goba mošomi-gotee yo re dumago go ba le yena maphelong a rena. Go e na le go sola, lebelela menyetla go reta le go aga batho ba bangwe. O ka makatša ke ka fao go sa maatlafatšego fela ditswalano tša gago, eupša gape go baka batho ba bangwe go nyaka go ba le wena nako e ntši. Modimo a go šegofatše.