Kgonthišetšo e šegofaditšwego – Letšatši la 3

Aowa, dilong tšeo ka moka re šetše re fentše ka botlalo ka yo a re ratilego. Gobane ke tseba ntle le pelaelo gore ga go se se kago re aroganya le Modimo yo a re ratago: ga se lehu goba bophelo, ga se barongwa goba magoši a semoya goba balaodi ba semoya, goba dilo tša gonabjale goba tša ka moso, ga se sa kua godimo sebakabakeng, goba sa kua fase bodulabahu – gare ga tšohle tše di hlodilwego ga go se se kago re aroganya le Modimo yo a re ratago ka Kriste Jesu, Morena wa rena. Baroma 8:37-39

Horatio Spafford (1828–1888) e be e le moemedi wa molao wa go huma le dinala wa Chicago wa feme e atlegilego ya molao, legae le lebotse, mosadi, barwedi ba bane le morwa. Gape e le Mokriste le moithuti yo a botegago wa Mangwalo a Makgethwa.

Kgabagareng ya katlego ya gagwe ya ditšheletše le mošomo, Horatio le mosadi wa gagwe  ba ile ba loba morwa wa bona gasehlogo. Ka moragonyana, ka 8 Diphalane, 1871, mollo o mogolo wa Chicago o tšhumile dipeeletšo ka moka tša mafelo a meago tše Spafford a bego a na le tšona. Ge o bala puku ya Jobo morago bjale, o ka nagana gore tše ka moka di kwagala di tlwaelegile.

Ka 1873, Spafford o rulagantše leeto ka sekepe go ya Yuropa go nea mosadi wa gagwe le barwedi ba bona sebaka sa go ikhutša gore ba kgone go fola go tšwa go masetlapelo a bona. O rometše mosadi wa gagwe le barwedi pele, gomme a šala Chicago go hlokomela kgwebo. Matšatši a mmalwa ka morago, o a mogetše tsebišo ya gore sekepe se thutše. Go no swana le bophelo bja Jobo, barwedi ba gagwe ka moka ba nweletše; mosadi wa gagwe o phetše. Ka pelo e bohloko, o nametše sekepe go ya go mosadi wa gagwe yo a nyamilego le go kwa bohloko kua Engelane. E bile mo leetong le mo a ngwetšego mantšu a:

“Ge khutšo boka noka etla tseleng ya ka

Ge manyami bjalo ka maphoto a lewatla kgokologa

Go sa šetšwe gore mathata a ka ke afe, Wena o nthutile gore ke re, go lokile, go lokile, ka moya wa ka.”

Go kgonega bjang gore banna ba ba babedi, Jobo le Horatio Spafford, ba tšwele pele go tumiša Modimo ka gare ga manyami a bona le masetlapelo? Gore motho a re, “Morena o be a file, mme bjale o tšere. A a retwe!” (Jobo 1:21b) gomme yo mongwe a boeletše polelo ye sefeleng sa gagwe.

Temana e nngwe le e nngwe ya sefela se sebotse sa Spafford e na le ditlhagišo tše botse tša tumelo le nnete. Go sa šetšwe masetlapelo, khomotšo ye e tšwago go tumelo e maatla go Modimo e phadima ka go taga kudu leswiswing. Sefela se se bolela bohloko le tlhophego, eupša gape ka kholofelo ya go ya go ile ye Paulose a bolelago ka yona go Baroma, kholofelo ya badumedi ka moka ba nago le yona.