Kgonthišetšo e šegofaditšwego – Letšatši la 1

Ka kgopelo e kgethegilego, re kgopetšwe go boeletša lelokelelo la mengwaga ye mmalwa ya go feta. Re rapela gore e tla ba tšhegofatšo e kgethegilego go babadi ba rena ka moka.

Ka gona, a re batameleng go Modimo ka botshepegi le tumelo ya nnete, re se na boitshetshengo, re le mo nkego re hlapile ka meetse a a sekilego. Baheberu 10:22

Ke goletše ka kerekeng e nnyane kua Benoni. Re be re na le sebapadi se tee fela sa pianao gomme ge a be a se gona tirelong ya mesong, ka lebaka lefe goba lefe, re be re opela mmino wa akapela. Ge se se direga, re be re opela sefela Kgonthišetšo e šegofaditšwego. A ke tsebe gore ka lebaka la eng, ke nagana gore ke ka gobane molodi o bonolo go rena ba re sa kgonege go opela, go ngunanguna sefela ka ntle le thušo! Ka lebaka leo, e bile ye nngwe ya difela tše ke e thutilego tšona ka hlogo, le ge e be e se ye nngwe ya difela tša ka tša mmamoratwa. Bjalo ka ngwana, a ke nagana gore ke e kwešišitše gabotse.

Kgonthišetšo e šegofaditšwego e ngwetšwe ke Fanny Crosby (1820–1915), yo a lemogwago bjalo ka yo mongwe wa bahlami ba bokgoni ba go tuma kudu wa difela lefaseng. Le ge a ile a foufalwa morago ga matswalo a gagwe, Fanny o ngwetse difela tša go feta tše 8 000.

Letšatši le lengwe, Fanny o eteše mogwera wa gagwe Phoebe Knapp. BagaKnapp ba be ba tsenya phaepe e kgolo ya okene, eupša e be e sa felela, ka gona Phoebe o be a raloka molodi wa mmino o moswa wo a bego a sa tšo o hlama go piano. Ge Phoebe a botšiša mogwera wa gagwe, “O nagana gore molodi o reng?” Fanny a araba, “Kgonthišetšo e šegofaditšwego, Jesu ke wa ka!”

Mangwalo a ruta gore re ka tseba ka nnete gore re lokolotšwe ka lehu la Jesu. Boitshepo bjo ga bo a thewa go maikutlo a ka gare goba dišupo tša ka ntle. Go e na le moo, “Kgonthišetšo e šegofaditšwego” ye e theilwe go dikholofetšo tša Modimo yo a botegago le lentšu la gagwe le le buduletšwego. Ga e a ithekga go tekanyo ya tumelo ya rena, eupša go morero wa tumelo ya rena – Kriste ka boyena!

Kgonthišetšo e šegofaditšwego e aba seswantšho sa lethabo la tsepelelo le Funny a itemogetšego lona go Modimo. Le ge a be a le sefofu, o hlaloša kgonthišetšo ya gagwe go Jesu bjalo ka go aba “dipono tša go ubulwa”. Ka nnete, se e bile kanegelo ya bophelo bja gagwe – ga e be kanegelo ya maphelo a rena.