Kgaugelo ya Modimo, lerato le maatla – Letšatši la 5

Re gola le kgopolo ya gore Modimo ke yo mogolo le go re feta ka moka. Dipesalome di hlaloša Modimo bjalo ka Kgoši ya lefase yo a bušago ka maatla le borena (Pesalome 111:2-3). Ge Modimo a etla lefaseng, o dirile ka tsela ye motho a bego a sa letela. Modimo ga a tla bjalo ka yo mogolo kudukudu, eupša bjalo ka yo monnyane kudu. Modimo, yo a swerego dinaledi le dipolanete ka diatleng tša gagwe, o bile embrio ya motho, ngwana yo a phuthetšwego ka diaparo.

Re ba gape le seswantšho-kgopolo sa Modimo bjalo ka wa go sa Felego. O be a le gona mengwaga ka moka gomme o tla ba gona mengwaga ye e tlago. Ge re bapetša nakwana ya motho le go sa felego go gokgethwa ga Modimo, go bonala eke ga a fihlelelege le go ba kgole kudu. Se se re tlatša ka poifo. Eupša ka matswalo a Jesu, Modimo o tswaletše bokgole magareng ga go sa felego le go phela nakwana. Modimo e bile yo mongwe wa rena. Gomme barongwa ba re: “Se boife.” Bjalo ka ge ngwana a fihlelelega, Modimo o ile a fihlelelega.

Modimo o bile kotsing e kgolo ka go tla go rena ka go ba Jesu. Batho ba tla mo lemoga bjalo ka Modimo? Ka nako yeo batho ba rile: “Na kgane ga se yena morwa wa mmetli?” (Mateu 13:55). Gape ba rile: “Na go na le se sebotse se se ka tšwago Nasaretha?” (Johanese 1:46). Modimo o tlogetše borena bja gagwe, letago le maatla ge a e ba motho. Ke mang yo a bego a letetše seo?

Ke ka lebaka leo batho ba nako yeo ba bego ba maketše. Ba kgahla ke ka tsela ye Modimo a bego a dira dilo ka yona, ka tsela ye a beilego bophelo bja gagwe kotsing – eupša o dirile seo ka gobane o be a nyaka go bontšha lerato la gagwe go wena le nna.