Ke tla – Letšatši la 19

Bokamorago: Magetla a gagwe a thothomela gomme dikeledi di ela marameng a gagwe, Celeste Nurse o boditše Moahlodi Johanese Hlophe Kgorongtsheko ya Godimo ya Kapa Bodikela ka nako yeo, mengwaga ye 19 ya go feta, a lemogilego gore ngwana wa gagwe wa matšatši a mararo o utswitšwe kua Sepetleleng sa Groote Schuur. Zephany o ile a “hwetšwa” morago ge sesi wa gagwe wa madi o monnyane, a botša batswadi ba gagwe gore lekgarebe le le dirago mphato wa marematlou sekolong sa gagwe o swana le yena le batswadi ba gagwe. Diteko tša madi di dirilwe tšeo di netefaditšego gore ka nnete ke ngwana wa bona yo a utswitšwego.

Kanegelo ye ya ka godimo e mmakaditše le go tlatša pelo ya ka ka lerato. Ke na le nnete ya gore go na le batho ba bantši bao ba kago theeletša kanegelo gomme ba ipotšiša gore: “Modimo o be a le kae? Ke ka lebaka la eng a dumeletše seo go direga? Kgane ga se Modimo wa lerato?” Se se nkgopotša kanegelo ye e latelago:

Rapolase yo a dumelago o be a na le pere yeo a bego a e šomiša go dira mešomo e mentši polaseng. Bošegong bjo bongwe bja ledimo la magadima, pere ya bofologa gomme ya tšhaba. Ge rapolase yo mongwe yo a sa dumelego a ekwa ka seo, o rile: “Tšeo ke ditaba tše mpe. Ke ipotšiša gore Modimo o be a le kae? Ke ka lebaka la eng a sa thibela seo go direga?” Rapolase yo a dumelago a araba ka boleta: “Tše mpe goba tše botse. Go diregile. Ke a tseba gore Modimo wa ka o laola dilo ka moka.”

Matšatši morago, batho ba makala, pere ya boa – le mohlape wa dipere tša naga tšeo di bego di e latela go tšwa thabeng go ya moo e bego e tlwaetše go hwetša dijo le meetse gona polaseng. Rapolase a tswalelela dipere sefero gomme ka bošego bjo tee o hweditše mohlape wa tšona. Rapolase yo a sa dumelego a bona seo gomme a re: “Se ke mahalatse.” Rapolase yo a dumelago a fetola: “Tše mpe goba tše botse. Ke a tseba gore Modimo wa ka o laola dilo ka moka.”

Moragonyana ga fao, morwa wa rapolase yo a dumelago o ile a ntšha e tee ya dipere tša naga. A namela pere, a thelela gomme a wela fase, a robega leoto. Ge rapolase wa go se dumele a bona leoto la mošemane le tsentšwe samente le go kwa se se diregilego, a re: “Tšeo ke ditaba tše mpe. Ke ipotšiša gore Modimo o be a le kae? Ke ka lebaka la eng a sa thibela seo go direga?” Rapolase yo a dumelago a araba ka boleta: “Tše mpe goba tše botse. Go diregile. Ke a tseba gore Modimo wa ka o laola dilo ka moka.”

Matšatši a mmalwa morago ga fao, sehlopha sa bahlabani ba bogale bao ba bego ba itlhamile ba kokotile lebating la rapolase yo a dumelalgo. Ba nyakile gore barwa ba gagwe ka moka ba ba latele le semeetseng. Ba be ba thwala maloko a maswa. Rapolase wa potego a fetola ka gore ona le morwa o tee fela. Ge bahlabani ba bona leoto la gagwe le loketšwe semente, ba rile: “Aowa, monna yo a ka se thuše ka selo.” Ba goma gomme ba sepela. Ka setu, rapolase yo a dumelago a tswalela mahlo a gagwe gomme a tumiša Modimo ka tšhireletšo ya gagwe.

Go Jesaya 55:8-9 re bala gore: “ ‘Megopolo ya ka ga e swane le ya lena, le ditsela tša ka di fapana le tša lena. Bjalo ka ge magodimo a phagame kudu ka godimo ga lefase, ka wona mokgwa woo ditsela le megopolo ya ka di ka godimo ga tša lena.’ ” Lasarose o be a swanetše go hwa, gore leina la Modimo le tumišwe ge Jesu a mo tsoša bahung (Johanese 11). Ka mo go swanago, monna wa sefofu o belegwe e le sefofu, e se ka lebaka la sebe sa batswadi ba gagwe, eupša gore leina la Modimo le tumišwe ge Jesu a mo fodiša (Johanese 9).

Ka dinako tše dingwe dilo di a direga go rena tše re ka se di hlalošego. Seo re kago se tseba ke gore Modimo o laola dilo ka moka le gore A ka se dumelele selo sefe goba sefe seo re ka palelago go emelana le sona. A re kgethe go tumiša Modimo ka dinako tše botse le tše mpe. Re ka, bjalo ka rapolase yo a dumelago, ema re maketše ge dikarolo tša phasele di kopanywa gomme re thoma go kwešiša dilo. Modimo a go šegofatše.