Ke tla – Letšatši la 18

Ekaba e sa le wa ikhwetša boemong moo o ikwilego o ka re legogwa le tlošitšwe ka tlase ga maoto a gago? O itebelela ka seiponeng gomme o hwetša go le boima go dumela gore boemo ka nnete ke bja gago. Mohlomongwe bo akaretša bogolofadi, tlhalo, bolwetši, go ripša leeto goba letsogo, go ratana ka ntle ga lenyalo, go tšeelwa dithoto, tlhorišo, temalelo goba gaešita le go nyamišwa ke motho yo o bego o mo tshepha e le ruri. Maemo a bjalo a ka fediša kholofelo ya rena. Eupša go dula go na le kholofelo – ge re dumela seo.

Letšoba le le pinki, le tsebjago ka shibazakura, le dirile phapano go banyalani kua Shintomi kua Japane. Toshiyuki le mosadi wa gagwe, Yasuko Kuroki, ba nyalane ka 1956. Morago ga fao ba šomile ka boima bjalo ka borapolase ba tša maswi le go aga bophelo bja lethabo le bana ba bona ba babedi. Toro ya bona ya ka morago ga ge ba tlogetše mošomo wa bona e be e le go sepela mmogo ba bona Japane.

Ka mengwaga ye 52, Yasuko a foufala nakong ya beke ka lebaka la mathata ao a amantšhwago lebolwetši bja gagwe bja swikiri. Go oketša go ditlhohlo tša mmele, bofofu bja gagwe bo utswitše lethabo la gagwe gomme bja dira gore a be le kgateletšego e kgolo ya monagano. Maiteko ka moka a monna wa gagwe a go mo thabiša a se atlege. Lega go le bjalo, ba se emiše go leka.

Ka letšatši le lengwe Toshiyuki a hwetša letšoba le le pinki la shibazakura. Mengwaga ye mebedi ya go latela, a bjala diketekete tša matšoba a ka serapeng go dikologa ntlo. Ge seruthwana se fihla, serapa se be se kgahliša ka mebala ya go taga, gape go na le monkgo o mo bose ka serapeng. Ka pela polase ya thoma go goketša baeti go tlo bona matšoba. Lehono batho ba ka bago 7 000 ba etela polase ya bona letšatši le letšatši ka seruthwane go ipshina ka matšoba a mabotse. Ka godimo ga dilo ka moka, Mohumagadi Kuroki a myemyela gape!

Bofofu bja Yasuko bo tlišitše kgetho go Kuroki: ba ka thoma go sola dilo ka moka le bohle bao ba le kgauswi le bona go seo se diregilego go bona goba ba ka amogela “tlwaelo ya bona e mpsha” le go e thabela. Ba kgetha sa bobedi gomme ka sona, ba itemogela ka fao baeti ba diketekete ba ipsinnego ka serape sa bona, eupša gape sammaletee ba hlohleletšwa go tšwela pele, ba tseba gore maemo a šiišago ka dinako tše dingwe a ka ba a tagilego le go ba kaone go feta ka mo go bego go letetšwe.

Go Genese re bala gore bomorwarrago Josefa, bao ba mo lahletšego ka moleteng gomme morago ba mo rekišetša Baishmaele, ba eme pele go yena go reka dijo nakong ya komelelo e šoro. E be e le moetapele gomme mathomong ba se ke ba mo tseba. Ge ba tseba gore ke yena, ba ile ba tšhoga kudu. Go Genese 50:20 Josefa lega go le bjalo o re: “Le ile la rera go ntira bobe, eupša Modimo a fetoša bobe bjoo botse, gore a tle a dire se re se bonago lehono, e lego go phološwa ga batho ba bantši.” A lemoga gore Modimo a ka dira gore dilo ka moka di šomele go hola bao ba mo ratago (Baroma 8:28).

Go tswalela ga kgwebo ga go re gore ke mafelelo a mošomo wa gago wa kgwebo; e ka ba mathomo a kgwebo e kaone, ka gobane o ithutile dithuto tše bohlokwa. O ka ikwa o ka re ke mafelelo a lefase ge ba go hladile, eupša ekaba Modimo ga a kgone go go nea monyetla wa bobedi wa lethabo? Gomme ngwana wa gago yo a golofetšego yo o llilego kudu ka yena mathomong a ka ba mpho e kgolo bjalo ka ge o tla lemoga bogona le mogau wa Modimo letšatši le letšatši. A re tsepeletšeng mahlo a rena go Yena le kholofelo ya rena go Yena, ka gobane go sa šetšwe ka fao boemo bo ka bago šoro ka gona, go dula go na le kholofelo go Yena! Modimo a go šegofatše.