Ke mang Monna yo? – letšatši la 2

Mathomong, monna wa baki e telele le meriri e meso o be a šoma fela kua Cape Town, eupša morago go ralala le Afrika Borwa ka moka le gaešita le ka ntle ga mellwane.

O be a sa swane le batho ba bagwe. A ikokobeditše, eupša a sa dumelele batho go ka mmefediša. O be a na le lerato kudu leo ka go dira phošo ya gore ke metlae. A le boleta, eupša a bolela ka go lebanya le therešo. Mang le mang o be a ikwela, ka tsela le ge e le efe, ba lokologile go Yena – ntle le balaodi. Ba mmone bjalo ka tšhošetšo go bona le dipholisi tša bona.

Palo ya balatedi ba gagwe ya oketšega. Ba bantši ba tla go mo theeletša. Ka dinako tše dingwe, go ile gwa swanelwa ke go oketša dipese le diterene. Mathomong, O be a rera fela ka Disontaga kua St George’s Cathedral kua Cape Town. Go be go se na motho yo a kago rera bjalo ka Yena. A rera ka dilo tša letšatši le letšatši bjalo ka go rata, inthanete, rakpi, sekolo goba ofisi. Morago, Lepatlelo la Kgwele ya maoto la Cape Town le ile la palelwa ke go rwala batho ka moka gomme batho ba bogela go diskrini tše kgolo ka ntle ga lepatlelo. Balaodi ba leka go thibela se gomme A thibelwa go bolela phatlalatša.

Ke moka, gateetee, A nyamalala matšatši a mmalwa. Go bile le mabarebare a gore O bolailwe ke madira a tšhireletšo. Morago ga nako, A tšwelela gape gomme a bitšwa motutuetši wa kganetšo ke balaodi le ba bangwe ba baetapele ba kereke. Mohlanogela-mmušo, yo a nyakago go baka dikgaruru le go thoma khuduego ka nageng. A romelwa kgolegong ka ditatofatšo tša maaka le go nagana gore o bolailwe. Ba bantši ba sa nyakana le le monna yo. Mohlomongwe O sa phela.

O a mo tseba?

Morena Jesu ke bogare bja tumelo ya Bokriste. Go Mateu 7:24, O hlalošitše gore ge onyaka go aga motheo wa go tia moo o kago aga ntlo ya bophelo bja gago, o swanetše o diragatše mantšu a a gagwe. O swanetše ke go tšea sepheto. Jesu ke boikgopolelo, goba ke Yo a rego ke Yena – Morwa wa Modimo. A ka fetoša maphelo.