Ke mang Monna yo? – letšatši la 1

O be a apere baki e telele. Meriri ya gagwe e meso e kgoma magetla. Ga se a dira nako go ya go mokuti wa meriri. Sefahlego sa gagwe se be se tletše ka maledu. Ge a lebelela lefase, e be e le ka tebeledišišo ya tshekatsheko e bohlale. Mahlo a gagwe e be e le a botho gomme A fapantšhwa le ba bangwe ka ge ka sebopego e be e le yo motelele.

Kae le kae kua Cape Town batho ba be ba bolela ka Yena. Mang le mang o be a bolela ka Yena. E be e le yo a fapanego. Kua Company Gardens, O ile a ema Sedibeng gomme a bolela ka Modimo. Ka tlase ga maporogo ka toropong, A bolela le bao ba se nago magae le baneneri. Go mafelo a bagweba-ka-mmele le balaodi ba bagweba-ka-mmele, O bile le mantšu a bogale: “Le tšea tokologo ya basetsana ba.” Go bao ba tšhabetšego ka nageng le bahudugi bao e sego ba molao go tšwa Afrika ba bile le lefelo la go ikgetha ka pelong ya gagwe e botse.

Ka letšatši le lengwe, A kgopela go bolela le palamente gomme A boledišana le mmušo ka diphošo tše ntši ka mo nageng. A kgopela Khansele ya Cape Town City lenaneo la dilo ka moka kua Mother City tše A kago di rapelela.

Legaeng la balwetši bao ba hlokafalago ka Aids, A ba botša ka Tatagwe wa legodimong. A tšea leeto go ya Stellenbosch gomme a kopana le diprofesa tša thutatumelo yunibesithing. Ba ile ba makatšwa ke tsebo ya gagwe e kgolo gomme ba mmotšiša: “O ithutile kae?” Ka letšatši le lengwe, pele ga e tee ya diinstitšhušene tše kgolo tša ditšhelete kua Mokgotheng wa Adderley, A fa thero a ahlola ka bogale maatla a tšhelete. Kua Bookelong bja Tygerberg, A etela balwetši le go fodiša ba bantši ka lentšu le tee goba seka. Dingaka di ile tša makala. O be a fapane le motho yo a dumelago gore mmele o ka ikalafa goba moikgakanyi go tsebo ya tša kalafo.

Ka letšatši le lengwe, A ya tirelong ya poloko. A batamela pele gomme a re go setopo ka lepokising: “Tsoga!” Gwa direga ka mo A boletšeng. Batho ba ile ba tšhoga. Ke mang Monna yo? Go be go se na yo a tsebago gore O tšwa kae. Go se na yo a tsebago moo A dulago.