Gopola maatla a gagwe – Letšatši la 9

Ka mehla re swanetše go kgetha magareng ga ditsela tše fapanego tša go lebelela bophelo – tsela ya rena le tsela ya Modimo. Boitshwaro bja rena bja tlhago ke go dira dikahlolo tša rena le ditekelo, le go gata magato a a swanetšego. Le ge go le bjalo, gantši, dikahlolo tše re di dirago di fošagetše. Diema 14:12 ke segopotšo se sebotse sa se: “Go na le tsela ye e bonalago nke e lokile, fela mafelelong e iša lehung.”

Go kaone kudu go ithekga go pono ya Modimo ya bophelo go e na le ya gago. Pono ya rena ya bophelo e tla dira dikahlolo tše di fošagetšego ka batho, maemo, le bophelo ka kakaretšo, se kotsi kudu le go feta, mabapi le ka fao re ka yago legodimong. Go ya ka kwešišo ya rena, re tla nagana gore re ka ya ka borena. Ka lehlakoreng le lengwe, re tla tšea sephetho sa gore ga go bohlokwa seo re se dumelago, ka gobane ditsela ka moka di ya go Modimo! Gomme ka letšatši le legolo, re tla fetoga ditlaela. Kahlolo e tla bontšha gore re ithekgile go tsela ya rena ya go lebelela bophelo, go e na le tsela ya Modimo.

Go kaone kudu go “tshepha yena ditseleng tša rena ka moka”. Naa se se ra go reng le gona re se dira bjang? Gabotse, go ra gore re lahle boitshwaro bja rena bja tlhago bja go ka bona bophelo ka mo re ratago le, ka go sokologa, re ye go Modimo re amogele pono ya gagwe ya bophelo. Ponong ya Modimo, ka moka re badiradibe bao ba hlokago Mophološi. O re file Mophološi. Go feta moo, ka borena, re tla dira diphetho tše fošagetšego – ka gona ga a re nea feela Mophološi, eupša gape le lentšu la gagwe go ba lebone la go re hlahla le seetša tseleng ya rena. Go mo dumela, ka gona, go hlaloša gore re amogela dipono tša gagwe mabapi le dilo ka moka. Go diphetho tša rena ka moka, re hloka go tseba se se tlago mo thabiša kudu. Ke eng se se tlago bontšha bohlale bja gagwe, botho le kwelobohloko? Ke eng se se tlago mo tlišetša letago? Gomme, re gate magato a maleba. Ke nnete gore ka dinako tše dingwe go dira diphetho go ya le ka tswalano ya rena le Modimo, go e na le go diriša maitemogelo, go ka tliša tšharakano go rena gomme go ka se thabiše batho ba bantši. Le ge go le bjalo, seema se tšwela pele gore, “Yena o tla go lokišetša ditsela.” Ka mantšu a mangwe, go sa šetšwe gore ke ba bakae bao ba go lwantšhago goba go go kwera, mafelelong o tla se bonwe molato. Ditsela tša gago di tla lokišwa, ka ntle le mathata, ka khutšo, ka ntle le go bonwa molato goba dilo le ge e le dife tšeo di hlagelago ba ba se nago nako ya Kriste le dipono tša gagwe.

Se bohlokwa kudu, ke gore ge re mo amogela, re tla amogela boleng bja gagwe bjoo a bo beago go Morwa wa gagwe gomme re tla retologela go Jesu bjalo ka Mophološi wa rena a nnoši le mohlahli yo a bolokegilego go letago le le tlago.