Bible Society of South Africa
Dithulaganyo tša go bala
Gopola maatla a gagwe
Gopola maatla a gagwe – Letšatši la 6
Frank Retief

Gopola maatla a gagwe – Letšatši la 6

Tahlo

(Di)temana ya Bibele

MARKOSE 5

15Ge ba fihla go Jesu ba bona motho yola a bego a tsenwe ke bademone. O be a dutše, a apere, le tlhaologanyo ya gagwe e boetše sekeng, mme ba boifa.

MARKOSE 5:15NSO00Bula go Mmadi wa Bibele

MARKOSE 5

Jesu o leleka meoya ye mebe mothong

1Jesu le barutiwa ba gagwe ba fihla ka mošola wa letsha la Galilea, nageng ya Bagerasa. 2Ge Jesu a seno tšwa ka leselawatleng, a gahlana le monna yo mongwe yo a nago le moya wo mobe a etšwa mabitleng, 3moo a bego a dula gona. O be a se sa kgona go tlengwa ke motho ešita le ka diketane. 4Ke gantši mo a ilego a tlengwa maoto le diatla ka diketane, eupša nako le nako a kgaola diketane tšeo tša diatla le tša maoto, mme go se motho yo a mo kgonago. 5Bošego le mosegare o be a dula a le mabitleng le dithabeng, a goa a bile a ikgobatša ka maswika.

6E rile ge a bona Jesu a sa le kgojana, a mo kitimela, a fihla a mo khunamela, 7a goeletša kudu a re: “Na o nyakang mo go nna, wena Jesu, Morwa wa Modimo Yogodimodimo? Ka Modimo ke a go rapela, o se ke wa ntlhokofatša.” 8O ile a realo ka lebaka la ge Jesu a be a rile: “Etšwa go motho yo, wena moya wo mobe!”

9Jesu a mmotšiša a re: “Ke wena mang?”

Yena a mo fetola a re: “Ke nna ‘Lekoko’, ka gobane re ba bantši!” 10Gomme a rapela Jesu gagolo gore a se ke a raka meoya yeo ye mebe nageng yeo.

11Mola kgauswinyana go be go na le mohlape wo mogolo wa dikolobe o fula motheogeng wa thaba. 12Meoya yeo ye mebe ya kgopela Jesu ya re: “Re dumelele go ya mola dikolobeng tšela gore re di tsene.” 13Jesu a e dumelela, gomme ya tšwa go monna yola ya yo tsena dikolobe tšela. Gomme mohlape ka moka wa dikolobe tše e ka bago tše dikete tše pedi wa thetheoga motheogeng wa wela ka letsheng wa betwa.

14Badiši ba tšona ba tšhaba ba yo tsebiša batho ba ba lego motseng le ba ba lego mašemong. Batho ba ya go bona se se diregilego. 15Ge ba fihla go Jesu ba bona motho yola a bego a tsenwe ke bademone. O be a dutše, a apere, le tlhaologanyo ya gagwe e boetše sekeng, mme ba boifa. 16Ba ba di bonego ba yo anegela ba bangwe se se hlagetšego monna yola wa bademone, le se se hlagetšego dikolobe.

17Ba kgopela Jesu gore a tšwe ka nageng ya bona.

18E rile ge Jesu a tsena ka leselawatleng, monna yola a bego a tsenwe ke bademone a mo kgopela gore a sepele le yena.

19Jesu a se ke a mo dumelela, fela a mo laela a re: “Boela gae go ba geno, o ba botše tše dikgolo tše Morena a go diretšego tšona tše, le ka mo a go šoketšego ka gona.”

20Monna yola a napa a tloga a ya seleteng sa Metse ye Lesome, a thoma go bega tše Jesu a mo diretšego tšona, gomme batho ka moka ba tlabega.

MARKOSE 5:1-20NSO00Bula go Mmadi wa Bibele

Moloko wa rena wa batho o tlwaetše go bona diswantšho tše mpe le tše botse. Difilimi le go dira dilo tše kgodišago di re tlogetše re letetše kudu tše botse gomme, ka manyami, re thabišwa kudu moo e lego gore boemong bjo bongwe, go boima go ka re thabiša. Le ge go le bjalo, kanegelo ye go Markose 5:1-20 e boima go ka e feta. Ke kanegelo ya go makatša, go bolela ka boripana, gomme re hloka go tseba gore ke eng se re swanetšego go se lebelela le se re swanetšego go ithuta sona.

Sa pele, go a thuša go gopola gore tikologo ye Jesu a e etetšego (e hlalošwago temaneng ya 1) ke tikologo ya Baditšhaba, e se tikologo ya Bajuda. Go ba gona ga dikolobe, dillo tša monna yo a hlasetšego ke bademone gomme a dula mabitleng e ka ba e bile maitemogelo ao a bego a tlwaelegile go leswiswi le ditumelo-khwelo tša ditšhaba tše ntši tša Baditšhaba.

Gomme, lemoga ka fao moya wo mobe o iphotolelago ka gona go Jesu. O khunamela Jesu ka poifo, (Markose 5:6,9). Ke ka gobane lefase la leswiswi le tseba gore, ge Jesu a fihla, go fedile. Jesu o tlile go fediša mešomo ya diabolose gomme le ge e sa e fediša ga bjale, Sathane, ge e le gabotse, o wele gomme o lebeletšane le kahlolo ye e tšhošago go tšwa go Modimo.

Sa go latela, go tla kgopelo ya go tsena dikolobeng gomme Jesu a dumela. Dikolobe ka moka di hwela ka letsheng gomme batho ba motse ba welwa ke poifo.

Ke ka lebaka la eng kanegelo e diregile ka tsela ye? Go a makatša. Ke ka lebaka la eng Jesu a ile fao? Naa meoya ye mebe e mo tsebile bjang? Ke ka lebaka la eng a e homoleditše? Ke ka lebaka la eng a e file tumelelo ya go tsena dikolobeng? Go na le dipotšišo tše dingwe tše ntši tše di tšwago temaneng ye. Le ge go le bjalo, dipotšišo tše ga se maikemišetšo a Markose mo. Se a nyakago gore re se bone ke ka fao batho ba ikarabetšego ka gona go Jesu.

O ka nagana gore batho ba go diila, bao ba phetšego le monna yo wa segaswi yo a ba tlaišitšego mengwagangwaga, ba ka thabela se Jesu a se dirilego. Mohlomongwe, ba be ba tla mo laletša motseng wo, ba mo phophothela go tliša maatla a gagwe le seatša go ba bangwe? Go be go se selo sa mohuta woo! Ba mo kgopetše gore a sepele! Bala temana ya 17. Naa ye ga se karabo ya go makatša? Mophološi o a tšwelela eupša o a rakwa! Se ga se fapane go batho ba bantši lehono, ba ba bonago phapano ye botse ye Jesu a e dirago maphelong a ba bangwe, eupša ba sa itemogela go mmoifa gomme, ka gona, ba a mo furalela.

Naa o tseba batho ba ba bjalo? Ba rapelele gore Modimo a bule mahlo a bona a a sa bonego le go nolofatša dipelo tše thata kudu.

Le ge go le bjalo go na le motho yo a amogetšego Jesu gomme a ka ba a dutše le yena – monna yo a lokololotšwego. Le ge go le bjalo, Jesu o mo file taelo ye e swanago ye a a neago nna le wena, ge re šetše re itemogetše maatla a gagwe, “Boela gae go ba geno, o ba botše tše dikgolo tše Morena a go diretšego tšona tše, le ka mo a go šoketšego ka gona.”

Bible Society of South Africav.4.26.9
RE HWETŠE GO