MARKOSE 5

₁Jesu le barutiwa ba gagwe ba fihla ka mošola wa letsha la Galilea, nageng ya Bagerasa. ₂Ge Jesu a seno tšwa ka leselawatleng, a gahlana le monna yo mongwe yo a nago le moya wo mobe a etšwa mabitleng, ₃moo a bego a dula gona. O be a se sa kgona go tlengwa ke motho ešita le ka diketane. ₄Ke gantši mo a ilego a tlengwa maoto le diatla ka diketane, eupša nako le nako a kgaola diketane tšeo tša diatla le tša maoto, mme go se motho yo a mo kgonago. ₅Bošego le mosegare o be a dula a le mabitleng le dithabeng, a goa a bile a ikgobatša ka maswika.

₆E rile ge a bona Jesu a sa le kgojana, a mo kitimela, a fihla a mo khunamela, ₇a goeletša kudu a re: “Na o nyakang mo go nna, wena Jesu, Morwa wa Modimo Yogodimodimo? Ka Modimo ke a go rapela, o se ke wa ntlhokofatša.” ₈O ile a realo ka lebaka la ge Jesu a be a rile: “Etšwa go motho yo, wena moya wo mobe!”

₉Jesu a mmotšiša a re: “Ke wena mang?”

Yena a mo fetola a re: “Ke nna ‘Lekoko’, ka gobane re ba bantši!” ₁₀Gomme a rapela Jesu gagolo gore a se ke a raka meoya yeo ye mebe nageng yeo.

₁₁Mola kgauswinyana go be go na le mohlape wo mogolo wa dikolobe o fula motheogeng wa thaba. ₁₂Meoya yeo ye mebe ya kgopela Jesu ya re: “Re dumelele go ya mola dikolobeng tšela gore re di tsene.” ₁₃Jesu a e dumelela, gomme ya tšwa go monna yola ya yo tsena dikolobe tšela. Gomme mohlape ka moka wa dikolobe tše e ka bago tše dikete tše pedi wa thetheoga motheogeng wa wela ka letsheng wa betwa.

₁₄Badiši ba tšona ba tšhaba ba yo tsebiša batho ba ba lego motseng le ba ba lego mašemong. Batho ba ya go bona se se diregilego. ₁₅Ge ba fihla go Jesu ba bona motho yola a bego a tsenwe ke bademone. O be a dutše, a apere, le tlhaologanyo ya gagwe e boetše sekeng, mme ba boifa. ₁₆Ba ba di bonego ba yo anegela ba bangwe se se hlagetšego monna yola wa bademone, le se se hlagetšego dikolobe.

₁₇Ba kgopela Jesu gore a tšwe ka nageng ya bona.

₁₈E rile ge Jesu a tsena ka leselawatleng, monna yola a bego a tsenwe ke bademone a mo kgopela gore a sepele le yena.

₁₉Jesu a se ke a mo dumelela, fela a mo laela a re: “Boela gae go ba geno, o ba botše tše dikgolo tše Morena a go diretšego tšona tše, le ka mo a go šoketšego ka gona.”

₂₀Monna yola a napa a tloga a ya seleteng sa Metse ye Lesome, a thoma go bega tše Jesu a mo diretšego tšona, gomme batho ka moka ba tlabega.

₂₁E rile ge Jesu a seletše gape ka mošola wa letsha ka leselawatle, lešaba le legolo la mo kgobokanela a le lebopong la letsha. ₂₂Gwa tla le mookamedi yo mongwe wa sinagoge yo leina la gagwe e bego e le Jairose. Yena ge a bona Jesu, a itahlela fase maotong a gagwe, ₂₃a mo kgopela a hlokofetše a re: “Morwedi wa ka o a hwa; nke o tle o mmee diatla gore a fole mme a phele!”

₂₄Jesu a ya naye, lešaba le legolo le mo latela ebile le mo pitlaganya.

₂₅Gona moo go be go na le mosadi yo mongwe yo a bego a feditše mengwaga ye lesome le metšo ye mebedi a bolawa ke bolwetši bja ngope. ₂₆O be a ile a tlaišwa kudu ke dikalafo tša dingaka tše dintši. A loba tšohle tše a bego a na le tšona, eupša bolwetši bja fela bo gola. ₂₇O be a šetše a kwele ka ga Jesu, mme a tla ka morago ga gagwe gare ga lešaba, a kgwatha seaparo sa gagwe, ₂₈a rile ka pelong: “Ge nka kgwatha le ge e le diaparo tša gagwe, ke tla fola.”

₂₉Gateetee a fola ngope yela gomme a ikwa mo mmeleng gore o fodile. ₃₀Jesu a kwa le semeetseng gore mo go yena go tšwile maatla, gomme a retologa a le gare ga lešaba, a botšiša a re: “Ke mang yo a kgwathilego diaparo tša ka?”

₃₁Barutiwa ba gagwe ba mo fetola ba re: “O ka re o bona ka moo lešaba le go pitlaganyago ka gona wa be o sa botšiša o re ke mang yo a nkgwathilego?”

₃₂Jesu a ba gadima go bona yo a mo kgwathilego. ₃₃Mosadi yola, ka ge a be a tseba se se diregilego mo go yena, a tla a thothomela a tšhogile, a itahlela fase pele ga gagwe, a mmotša tšohle ka bolwetši bja gagwe le ka mo a fodilego ka gona. ₃₄Jesu a re go yena: “Morwedi wa ka, tumelo ya gago e go fodišitše; sepela gabotse mme e be gona ge o fodile.”

₃₅Ya re Jesu a sa bolela, gwa fihla baromiwa ba go tšwa ga Jairose, ba re go yena: “Morwedi wa gago ga a sa phela, bjale Moruti o sa mo tshwenyetšang?”

₃₆Jesu a hlokomologa se ba se bolelago, gomme a re go Jairose: “Se tšhoge, sa gago a e be go dumela.” ₃₇Gomme a se dumelele motho go ya le yena, ge e se Petrose le Jakobose le Johanese, ngwanaboJakobose. ₃₈Ba fihla ga Jairose mo Jesu a ilego a bona batho ba gakanegile, ba lla ba golola gagolo. ₃₉Gomme a tsena, a re go bona: “Le reng le gakenegile le lla? Ngwana yo ga se a hwa, o ithobaletše.”

₄₀Bona ba mo sega. Yena a ba ntšhetša ntle bohle. A bitša tatagongwana le mmagwe le barutiwa bale ba gagwe ba bararo, mme a tsena ka mo ngwana a letšego ka gona. ₄₁A mo swara ka seatla, a re go yena: “Talita kum!” Ke go re: “Mosetsana, ke re go wena, tsoga!”

₄₂Ka bjako mosetsana yola a tsoga, a sepelasepela. O be a na le mengwaga ye lesome le metšo ye mebedi. Batho ba tlabega kudu. ₄₃Gomme Jesu a ba laya tsebegokwa gore ba se di botše motho, a laela le gore mosetsana yoo a fiwe dijo.