Gopola maatla a gagwe – Letšatši la 23

Mengwagaeng ya pele ya ngwagakgolo ya 20, go bile le moopedi wa mmino wa ebangedi yo a bitšwago Charles Alexander. E be e le moopedi yo a bego a sepela le bareri ba bagolo, Ngaka RA Torrey le Ngaka Wilbur Chapman, maetong a bona a go bega ebangedi. Le ge re sa ba tsebe lehono, e be e le batho ba go tuma mehleng ya bona.

Charles o nyetše Helen Cadbury, morwedi wa mothei wa kgwebo e kgolo ya tšhokolete Cadbury. E be e le mo-Amerika yo a bego a rutegile gomme mosadi wa gagwe e le mohumi wa maemo a phagamego wa Engelane. Ba be ba le batee go lerato la bona la Kriste gomme Helen o be a thuša bošego bjo bongwe le bjo bongwe dikopanong tša go bega ebangedi, a bolela le banyakišiši le go thuša ba ba nyakago phološo.

Bošegong bjo bongwe, kopano ye e bego e rulagantšheditšwe ba ba nwago bjala kudu, batho ba ba dulago mekgotheng le ba ba diilago, Helen o be a le ka phaphošing ya go aba dikeletšo ge mosadi yo mongwe wa meriri ya mahlafarara a apere diaparo tša mankgeretla a itahlela ka phapošing. Mohumagadi Alexander o lekile go hlaloša se sengwe mabapi le lerato la Modimo go yena, eupša o be a sa bone gomme e le sefoa. Karabo ye a e boletšego e bile, “O rata wena, eupša ga a nthate.” Mafelelong, o bile le tlhase ya go ka kwešiša. A retologela go Helen Alexander yo a phagamego kudu, a mo tsepeletše ka mahlong a re, “Nkatle”. Gateetee, Mohumagadi a mo gokarela gomme a mo atla. Gomme mosadi a boela gae. Le ge go le bjalo, o ile a boa gomme Helen o be a thabile go mmona dikopanaong a “hlwekile”.

Ke feela pontšho ya lerato la Tate le kamogelo tšeo di thušitšego mosadi wa go diila gore Modimo o a mo rata, ka gare ga maemo a gagwe. Le rena re hloka kgonthišetšo kgafetšakgafetša. Le ge go le bjalo, ga o nagane gore mola re be re na le botho, le go bontšha kwelobohloko le go amogela batho, re rata kudu ka mantšu le ditiro, mantšu a rena a be a tla kwagala kudu?

Gaešita le ditiro tše nnyane tša botho, go bao ba sa belaelago molaetša wa Kriste goba tlhoko ya semoya, di ka ba bohlokwa go fetošeng maitshwaro?

Mohlomongwe, go na le motho yo o mo tsebago yo a hlokago go tseba gore Modimo ke lerato. “Modimo ke lerato, gomme yo a phelago ka lerato o dula e le o tee le Modimo, le Modimo o dula e le o tee le yena.” Ba swanetše go bona le go itemogela seo. Ba swanetše go itemogela gore motho yo a rego o rata Modimo o ikemišeditše go ba gokara, ba na le ditšhila, ba nkga le go sa ratiwe, go ba rapelela le go ba hlokomela ka nnete.

Se ke nnete go mang le mang wa legoro lefe le ge e le lefe la leago. Lerato la Modimo le swanetše le bolelwe go bona, eupša bjalo ka ditiro tša Helen Alexander, ka dinako tše dingwe le swanetšwe le bonwe.

Gopola mantšu a Jesu go Mateu 25:40: “Kgoši o tla ba fetola a re: ‘Ruri, ke le botša gore ge le be le direla yo mongwe wa banabešo ba ba nyatšegago ba, le be le direla nna!’ ”

Dumelela lerato la Modimo go laola ditiro tša gago ka moka gomme ka mehla le phadime ka wena go bohle ba o kopanago le bona, kudukudu ba go lego boima go ka ratwa.