Gopola maatla a gagwe – Letšatši la 22

Mohlomongwe ka moka re tseba leina la mompshafatši wa go tuma wa nagwagakgolo wa 16, John Calvin. E be e le monna wa go tuma wa go boifa Modimo yo khuetšo ya gagwe e katologilego mengwagakgolong. Le ge go le bjalo, mohlomongwe ba mmalwa ba rena ba a tseba gore lebakeng le lengwe, go mantšu a tokumente ye e itšego, Calvin o ile a befela kudu gomme a bolela mantšu a hlabago go bao ba bego ba le gona. Calvin o itshotše kudu ka boitshwaro bja gagwe gomme ka pela a fetoga go bjona. Tiragalo e diragetše ge e sa le lesogana gomme a se a tuma, ka ge a tumile mengwageng ya ka morago. Tshekamelo ye go pefelo e bile katano ya bophelo ka moka go John Calvin.

Bjalo ka yena, ka moka re na le diphošo gomme pefelo ke ye nngwe ya diphošo tšeo. Ke mang mo go rena yo a sa tsebego dihlong tša go befela le go bolela dilo tše re ka se di bušetšego morago, tšeo ka nnete re itsholago gore re di boletše?

Ke nnete, go ba gona, gore ga se pefelo ka moka ye e bakago sebe. Ka dinako tše dingwe, pefelo ke phetolo ya maleba go sebe le go hlokeng toka. Le ge go le bjalo, e se pefelo ye e re aparelago, e re dira gore re lahlegele ke taolo ya rena ka mo gofeletšego gomme ya baka gore batho ba mmalwa ba gobale ka lebaka la go palela ga rena go itaola.

Ka go tseba tshikamelo ya rena go pefelo, moapostola Paulose o ngwetše gore, “Ge le ka tšhoga le galefile le se ke la lesa kgalefo ya lena e le diriša sebe, le gona letšatši le se ke la le sobelela le sa galefile.” (Baefeso 4:26)

O be a re botša gore re itaole ge re befetše. Dingangišano ka moka di swanetše di rarollwe lona letšatši leo. Go sego bjalo, go na le kgonagalo ya gore go hloka toka go ka baka pefelo ye e oketšegilego gomme, pele o tseba, diabolose o tšere taolo, gomme thulano e kgolo le terama di amile gampe ditswalano ka moka.

Ka dinako tše dingwe, mantšu a batho goba ditiro di ka baka bohloko bjo bogolo kudu gomme re ka ikwa re swanela ke go befela. Le ge go le bjalo, go bokaone kudu go nagana pele re bolela. Re swanetše re nyake go boloka ditswalano, e se go di roba.

Se se nyaka kgaugelo le boitshwaro. Naa ga se ka fao setšhaba sa Morena se swanetšego se itshware ka gona? Re bala ka go Testamente ye Mpsha ka Jesu a befetše, eupša lebakeng le lengwe, e be e le ka lebaka la go thathafatša dipelo ga batheeletši ba gagwe go Modimo goba, gaešita le dinako tše dingwe, go bao ba diilago.

Ge e ba o nyaka go kgopela yo mongwe tebaleleo, tswalano ye o nyakago go e lokiša, boemo bjo o nyakago go bo lokiša le yo mongwe, ke ka lebaka la eng o sa dire seo ga bjale, pele letšatši le dikela?