Gopola maatla a gagwe – Letšatši la 18

Ka dinako tše dingwe, batho ba re ge ba ka bona feela mohlolo, ba tla dumela. Ba bangwe ba re mehlolo e swanetše e be mabapi le bona le maemo a bona. Ge Modimo a ka ba phološa, ba tla dumela.

Sa pele, Bibele e tletše ka mehlolo ye e hlatsetšwago ke batho ba bantši ba, mafelelong, ba sa dumelago eupša ba goeletša, “Ga a bapolwe sefapanong! Ga a bapolwe sefapanong!”Gantši re na le go nyatša go thathafa ga dipelo tša rena tabeng ye. Lehono, re na le filimi ye e kgahlišago kudu le theknolotši ya thelebišene ye e re bontšhago dimaka tša lebato la lewatle le bogolo bjo bo makatšago bja lefaufau le letago la sekgoba se se tseneletšego. Le ge go le bjalo, ga re dumele.

Ge Jesu a be a le lefaseng, o dirile mehlolo e meraro ya go tsoša batho ba bararo lehung. Wa pele e bile mohlolo wa morwedi wa Jairose, moetapele wa sinagoge, wa bobedi e bile morwa wa mohlologadi kua Naine, wo go ngwetšwego ka wona go Lukase 7, gomme wa boraro ke go tsošwa bahung ga Lasarose go Johanese 11. Ba bantši ba bone mehlolo ye eupša ba se dumele, le ge ba bangwe ba dumetše.

Ebangedi ye nngwe le ye nngwe e ruma ka kanegelo ya tsogo e maatla bahung ya Jesu. Dithumo ka moka di mabapi le mohlolo o maatla – go pshikološwa ga leswika, baleti ba ba bego ba maketše lebitleng, barongwa ba seetša – direkoto ka moka di gona. Le ge go le bjalo, batho ba tšwetše pele le go thathafatša dipelo.

Naa se se hlaloša eng go rena ka moka bao re dumelago? Tsogo ya Jesu bahung ga e swane le go tsoša bahung batho ba bangwe ba bararo. Boraro bja bona mafelelong ba hlokafetše gape. Ye e be e le mehlolo ya tsošološo, go e na le tsogo, gomme go na le dikhupamarama tše di amantšhwago le yona. Le ge go le bjalo, ge Jesu a tsogile bahung, e bile gatee ya ba moka! Lehu le fentšwe ka mo go feletšego. Tsogo ya gagwe bahung ke kholofetšo go ba ba mo tshephago, gore bona le bona ka letšatši le lengwe ba tla tsoga bahung go bophelo bjo bo sa felego.

Rena ba re dumelago go Jesu, go batho ka moka, re na le kholofelo ya letago. Ee, re tlo hwa nameng. Le ge go le bjalo, re ka se hwe go ya go ile. Morena, yo a re šeditšego, le ge meoya ya rena e le go yena, o tla re tsoša bahung. Re tla ba le mebele e meswa, ra phela lefaseng le leswa, ka tlase ga legodimo le leswa le ka tlase ga taolo ya Kgoši ye kgolo. O se tsoge o nolegile moko!