Gopola maatla a gagwe – Letšatši la 1

Mantšu a a mabapi le Johanese Mokolobetši. O romilwe bjalo ka motseta go lokišetša Morena tsela. Ye ke tšwelopele e bohlokwa kudu gomme ga re a swanela go lahlegelwa ke bohlokwa bja temana ye ya lengwalo la rena la lehono.

Mehleng ya pele ya Mmušo wa Roma, go be go le selo se se tlwaelegilego gore motseta a romelwe pele ga molaodi yo a fentšego wa Moroma, go tsebatša phenyo ya gagwe lefelong la kgole kudu la ntwa. Go be go bonwa bjalo ka tutuetšo go boitshepo le tlhohleletšo go batho ba motse mabapi le bokgoni bja madira a bona go ba šireletša. Le ge go le bjalo, temaneng ye, go na le phethagatšo ya seprofeto sa kgale kudu (Malakia 3:1; Jesaya 40:2-3) mabapi le Mesia yo kgale a bego a letetšwe. Modimo o tla roma motseta yo a tlago lokišetša batho go tla ga Mesia, ka go ba kgopela gore ba sokologe le go ikemišetša go mo amogela ge a tlile.

Kgoeletšo ya Johanese Mokolobetši e a re thuša lehono, ka ditsela tše pedi. Ya pele, re ka ba le nnete ya gore yo a bego a bolela ka yena ka nnete e be e le Morwa wa Modimo. E be e se bofora, goba boikgopolelo. E be e le Mesia wa nnete yo a tlilego go tliša phološo go batho ba gagwe. Le ge go le bjalo, ya bobedi, kgoeletšo ya Johanese e be e le ye nngwe ya dišupo tše di bontšhago Jesu bjalo ka motho wa moswananoši; wa moswananoši mo e lego gore motseta o romilwe pele ga gagwe. Go se swane le batseta bao ba rongwago go yo tsebatša diphenyo tša madira go balaodi ba Baroma, motseta yo o lokišetša tsela ya Morena ka boyena. Go oketša moo, “Morena” yo a tlago, ga a tle bjalo ka mohlabani yo maatla, eupša bjalo ka mohlanka yo a tlago hlakodiša batho ba gagwe ka go ba hwela.

Go ba moswananoši ga Jesu go hlaloša dikgaolong ka moka tša pele tša ebangedi ya Markose, eupša mohlomongwe go kaone go hlaloša go ba moswananoši ga gawe go ya le ka taolo ya gagwe e kgolo. Bala kgaolo ya pele ya Markose gomme o bale ka dišupo tša gagwe tša moswananoši: ge a kolobetšwa, ka lentšu go tšwa legodimong; teko ya gagwe lešokeng; maatla a gagwe go banna ba a ba bitšago go ba barutiwa ba gagwe; maatla a gagwe go meoya ye mebe le maatla a gagwe a go fodiša balwetši. Tše ka moka ke dišupo tša motho wa moswananoši yo a nago le maatla ao a sa tlwaelegago go maemo ka moka a batho.

Re swanetše go tutuetša ke se. Go sa šetšwe gore go bonagala bjang, nako le nako, gore mmušo wa Kriste o kgauswi le go timelela, re swanetše go gopola maatla le bogolo bja gagwe, gomme ke taolo ye le maatla ao a bago le rena tseleng ya rena.