Go sepela le Modimo – Letšatši la 21
Go sepela le Modimo – o fetošitšwe: Paulose
(Di)temana ya Bibele
2 BAKORINTE 12
Fela gore ke tle ke se ikgogomoše ka tše di makatšago kudu tše ke ilego ka di utollelwa, ke ile ka kgontlhetšwa phatša nameng, phatša ye e bego e itirile moromiwa wa Sathane wa go ntlaiša gore ke fele ke ikokobetša. Ka rapela Morena gararo ke mo kgopela gore a ntlhomole phatša yeo. Yena a mphetola ka go re: “Kgaugelo ya ka e go lekane, gobane maatla a ka a tiile kudu mo go ba ba fokolago.” 2 Bakorinte 12:7-9
Ga go na motho yo a lokilego; ga gona motho yo a phethegetšego, go sa šetšwe gore re leka ka thata bjang. Re a fokola gomme re a palela ka gobane re na le boemo bja motho bjo bo lego gona ka lebaka la sebe; gaešita le dilo tše bonolo di boima go di dira ka maatla a rena. Re hloka kgaugelo ya Modimo; re hloka maatla a gagwe maphelong a rena. Mohlomongwe, re maketše go bala gore Eliya yo maatla “e be e le motho wa nama bjalo ka rena” (Jakobose 5:17), eupša ka se, Jakobose o bontšha gore motho yo mongwe le yo mongwe o na le bokgoni bja Modimo go ka dira tše makatšago, ka gobane o šoma ka batho ba ba tlwaelegilego.
Jesu o boditše barutiwa ba gagwe gore ba tla dira dilo tše kgolo go feta yena! Bjalo ka balatedi ba Kriste, ka dinako tše dingwe re ikwa re nologile moko ka lebaka la hlatse ya rena ye e fokolago, eupša gaešita le Eliya o bile le dinako tša kgatelelo ya monagano, le ge a be a tseba gore Modimo o šoma ka maatla ka yena. Modimo mohlomongwe a ka se tsoše motho bahung goba go thoma komelelo, eupša ka dipelo tše obamelago, o tla dira se se swanetšego nako e nngwe le e nngwe le boemong bjo bongwe le bjo bongwe.
Moapostola Paulose ke mohlala wo mmotse wa se. Tseleng ya gagwe go ya Damaskose, Saulo, yo e bego e le Mofarisei, o fetošitšwe ka kopano ya gagwe le Jesu (Ditiro 9:3). Paulose o šometše Modimo ka phišego pele le ka morago ga tshokologo ya gagwe, eupša bohlokwa bja nnete bo tlile bophelong bja gagwe morago ga go kopana le Jesu. Ka kgaugelo ya Modimo, Bokriste bo phatlaletše kudu ka motho yo leano la gagwe e bego e le go bo fediša!
Pele, Pulose e be e le mmolai yo a lahleditšwego, eupša ka morago motseta yo a buduletšwego, yo a tlišitšego lefaseng mpho ye e se nago thaka ya Modimo ya tebalelo le bophelong bjo bo sa felego, ka Jesu Kriste. Paulose o šomme ka thata go bega ebangedi, gantši a tlaišega kudu, eupša moeno wa gagwe e bile, “Gape mo go nna go phela ke go direla Kriste, go hwa ke go boelwa” (Bafilipi 1:21).
Temana ya lehono e bontšha gore Paulose o be a sa na bothata bjo a bego a palela ke go bo rarolla, le ge a be a rapela ka bjona. Naa re itemogela se maphelong a rena?
Modimo o thušitše Paulose go bona gore “phatša nameng” ye e dirile gore a se ikgogomoše; e mo thušištše go bota Modimo ka mo go feletšego, go e na le maatla a gagwe.
Kgaugelo ya Modimo e lekane go rena ka moka gape, go sa šetšwe “phatša” ya rena. Ka mahlamo a gagwe a magolo, re ka tseba khutšo bophelong le go thaba bofokoding go maemo ka moka. Re hloka go bega ditaba tše tše botse gore batho ka moka ba tsebe kgaugelo ya gagwe (Mateu 28:19-20).
